O‘zbekistonlik migrantlar jahonning 480 ga yaqin tashkilotida mehnat qilib, daromad topayotgani ma’lum bo‘ldi

O‘zbekistonlik migrantlar 30 dan ortiq davlatdagi 480 ga yaqin ish beruvchi tashkilotlarda mehnat qilib, daromad topmoqda. Bu haqda ayni paytda Toshkent shahridagi International Hotel Tashkent mehmonxonasida bo‘lib o‘tayotgan tadbirda Bandlik va mehnat munosabatlari vaziri Nozim Husanov ma’lum qildi.

Bandlik va mehnat munosabatlari vazirligi, Tashqi mehnat migratsiyasi agentligi, Xalqaro migratsiya tashkiloti, 70 dan ortiq xorijiy salohiyati ish beruvchilar, xalqaro ekspertlar va OAV vakillari ishtirok etgan tadbirda Tashqi mehnat migratsiyasi agentligining imkoniyatlari va o‘zbekistonlik mehnat migrantlarining huquq, manfaatlarini himoya qilish masalalari muhokama qilindi.

Forumda ta’kidlanishicha, so‘nggi uch yil davomida migratsiya geografiyasini kengaytirish orqali xorijda ishlash istagida bo‘lgan o‘zbekistonliklarni dunyoning rivojlangan davlatlariga ishga jalb qilish salmog‘i kengaygan.

Xorijning vakolatli davlat tashkilotlari va salohiyatli ish beruvchilari bilan doimiy muzokaralar olib borish natijasida bugungi kunda 30 dan ortiq davlatlarning 480 ga yaqin tashkiloti bilan hamkorlik kelishuvlari imzolanib, O‘zbekiston fuqarolari tashkillashtirilgan tartibda xorijga ishga jo‘natilmoqda, — deydi vazirlik axborot xizmati rahbari Mavjuda Mirzayeva.

Qo‘shimcha qilinishicha, 2021—2022-yillar davomida vaqtincha mehnat faoliyatini amalga oshirish uchun xorijga chiqib ketayotgan fuqarolar 17 ta “Ishga marhamat” monomarkazi hamda 150 dan ortiq kasb-hunarga o‘qitish markazida 30 ga yaqin kasbga o‘qitilgan. Shuningdek, 10 ga yaqin markazda chet tiliga o‘qitish orqali nazariy va amaliy tajriba olishiga ko‘maklashilgan.