Urganch xalqaro aeroporti tuman sababli uchta reysni qabul qila olmadi

​​Tuman Urganch xalqaro aeroporti ishini vaqtincha chekladi, deb xabar bermoqda Uzbekistan Airports matbuot xizmati.

Ma’lum qilinishicha, Uzbekistan Airways’ning Moskva—Urganch yo‘nalishi bo‘yicha HY-9616 yo‘lovchi reysi soat 03:30 da ob-havo sharoiti — quyuq tuman va ko‘rish masofasi 300 metrdan kam bo‘lgani sababli belgilangan aeroportga qo‘na olmagan hamda Navoiy shahridagi muqobil aerodromga yo‘naltirilgan.

Xuddi shu sababga ko‘ra Moskvadan SBI-3245 reysini amalga oshirayotgan S7 aviakompaniyasi samolyoti Urganch aeroportiga soat 03:00 da qo‘na olmagan va samolyot Buxoro aeroportiga yo‘naltirilgan.

Toshkent—Urganch yo‘nalishi bo‘yicha HY-53 reysining parvozi ham kechiktirilgan.

Ertalab tuman tarqagach, SBI-3245 reysi Buxorodan Urganchga soat 09:30 da, HY-9616 reysi Navoiydan soat 09:20 da, HY-53 reysi Toshkentdan soat 09:48 da uchib ketgan.

S7 Airlines aviakompaniyasining Urganchdan Moskvaga qaytish reysi mahalliy vaqt bilan 22:05 ga belgilangan.