O‘zbekistonning 4 ta hududida 7 mlrd so‘mdan ortiq kredit mablag’lari talon-toroj qilindi

Xorazm, Qahqadaryo, Namangan viloyatlari va Qoraqalpog‘iston hududida kredit mablag‘larini talon-toroj qilish holatlari aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.

Qayd etilishicha, Bosh prokuratura huzuridagi departament organlari tomonidan banklarning komplayens-nazorati tuzilmalari bilan hamkorlik doirasida pul mablag‘larining talon-toroj qilinishi bo‘yicha aniqlangan qonunbuzilish holatlari yuzasidan o‘z vaqtida qonuniy choralar ko‘rilmoqda.

Xususan, departamentning Qoraqalpog‘iston boshqarmasi tomonidan o‘tkazilgan tergovga qadar tekshiruvda “B.S.” MCHJ mansabdor shaxslari hududiy tijorat banki filialidan chorvachilikni rivojlantirish uchun ajratilgan kredit mablag‘larining 3,3 mlrd so‘mini boshqa maqsadlarda sarflab, talon-toroj qilgani aniqlangan.

Shu kabi, departamentning Hazorasp tumani bo‘limi tomonidan hududiy tijorat banki filialining murojaatiga asosan o‘tkazilgan tergovga qadar tekshiruvda “Sh.A.” va “H.M.” MCHJlar mas’ul shaxslari va boshqalar o‘zaro til biriktirib, parranda va ozuqa yemi sotib olish uchun “Sh.A.” MCHJga ajratilgan 2 mlrd so‘m kreditni “H.M.” MCHJga o‘tkazish orqali naqdlashtirib olib, talon-toroj qilgani aniqlangan.

Departamentning Pop tumani bo‘limi tomonidan o‘tkazilgan tergovga qadar tekshiruvda “S.S.” MCHJ rahbari M.X. va ish yurituvchisi O‘.M. hududiy tijorat banki filialidan MCHJga ayollar go‘zallik saloni va fitnes sport to‘garagini tashkil etish uchun ajratilgan imtiyozli kredit evaziga harid qilingan sport anjomlari va jihozlarini sotib yuborib, jami 1,2 mlrd so‘m kredit mablag‘ini o‘zlashtirish yo‘li bilan talon-toroj qilgani aniqlangan.

Departamentning G‘uzor tumani bo‘limi tomonidan o‘tkazilgan tergovga qadar tekshiruvda esa fuqaro R.K. yaqin qarindoshi Sh.X.ning nomidan “N.S.” dehqon xo‘jaligini davlat ro‘yxatidan o‘tkazib, chorva mollarini ko‘paytirish va yilqichilik faoliyatini amalga oshirish, zotdor otlar sotib olish hamda ko‘paytirish uchun bank filialidan ajratilgan 700 mln imtiyozli kredit mablag‘ini boshqa maqsadlarda sarflab, talon-toroj qilgani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkzilmoqda.

Mavzuga doir: 

• Toshkentda 1,3 mlrd so‘m kredit mablag‘ini o‘zlashtirganlar aniqlandi
• Namanganda MCHJ rahbarlari 700 mln so‘m kredit pulini talon-toroj qildi