Namangan aeroportida Rossiyadan qaytgan shaxs belgilangan tartibni buzib, chet elga chiqqani aniqlandi. Bu haqda viloyat ichki ishlar boshqarmasi axborot xizmati xabar berdi.
Ma’lum qilinishicha, 7-oktabr kuni Namangan xalqaro aeroportiga Domodedova–Namangan yo‘nalishidagi aviareys bilan uchib kelgan, 1993-yilda tug‘ilgan, Pop tumanida yashovchi fuqaro A.X.ga tegishli bo‘lgan fuqarolik pasporti aeroport chegara xodimlari tomonidan ko‘zdan kechirilgan. Mazkur pasportda ichki ishlar idoralarining fuqarolikni rasmiylashtirish bo‘limi tomonidan beriladigan “Dunyoning barcha mamlakatlariga chiqish uchun ruxsat beruvchi” viza-stiker yoki xorijga chiqish biometrik pasporti bo‘lmasa-da, Rossiya orqali belgilangan tartibni buzib, qonunga xilof ravishda Turkiyaga borib kelgani aniqlangan. Namangan viloyati Ichki ishlar boshqarmasi ma’lumotnomasida fuqaro A.X. muqaddam xorijiy davlatlarga chiqish masalasida ariza-anketa bilan murojaat etmagani ko‘rsatib o‘tilgan.
Shunday qilib, fuqaro A.X. o‘zining yuqoridagi xatti-harakatlari bilan qonunga xilof ravishda belgilangan tartibni buzib, chet elga chiqib, Jinoyat kodeksining 223-moddasi (qonunga xilof ravishda chet elga chiqish yoki O‘zbekiston Respublikasiga kirish) 1-qismida ko‘rsatilgan jinoyatni qasddan sodir etgan. Jinoyat ishi esa ayblov xulosasi bilan tegishli sudlov organiga yuborilgan.
Izoh (0)