Qosim-Jo‘mart To‘qayevning tantanali ravishda o‘z lavozimiga kirishish marosimi 26-noyabr kuni bo‘lib o‘tadi. Bu haqda Markaziy saylov komissiyasi yig‘ilishida ma’lum qilindi, deb yozadi Tengrinews.
“Markaziy saylov komissiyasi Qosim-Jo‘mart To‘qayevni Qozog‘iston Respublikasining saylangan prezidenti sifatida ro‘yxatga oldi. Saylangan prezident tomonidan qasamyod qabul qilish sanasi 26-noyabr deb belgilandi”, — dedi MSK raisi Nurlan Abdirov.
MSK majlisida Qozog‘istonda 20-noyabr kuni bo‘lib o‘tgan prezident saylovining yakuniy natijalari ham e’lon qilindi. Saylovchilarning 69,44 foizi, ya’ni 8 300 046 kishi ovoz bergan bo‘lib, shularning 6 456 492 nafari yoki 81,31 foizi Qosim-Jo‘mart To‘qayevni saylagan.
Bosh vazir o‘rinbosari — moliya vaziri Yerulan Jamaubayev prezident inauguratsiyasiga qo‘shimcha mablag‘lar ajratilmasligini ma’lum qildi.
“Prezident inauguratsiyasiga qo‘shimcha ravishda moliyaviy mablag‘lar budjetidan ajratilmaydi. Prezident tomonidan qasamyod qabul qilinishi katta mablag‘ talab etadi, deb o‘ylamayman. Shuning uchun biz tomonimizdan hech qanday qo‘shimcha mablag‘lar ajratilmaydi”, — dedi Jamaubayev jurnalistlarning savollariga javoban.
Izoh (0)