Pentagon Ukrainaga yetkazmalar tufayli bo‘shab qolgan qurol-yarog‘ zaxiralarini to‘ldirish uchun qurol sotib olish va shartnomalarni bajarish jarayonlarini tezlashtirmoqda. Bu haqda Reuters AQSH mudofaa vazirining xaridlar, logistika va texnologiyalar bo‘yicha yordamchisi Duglas Bushga tayanib xabar berdi.
Pentagon vakili jurnalistlarga ma’lum qilishicha, idora avvallari ketma-ket bajarilgan jarayonlarni endi bir vaqtning o‘zida birdaniga amalga oshirmoqda. Shuningdek, uning ta’kidlashicha, AQSH armiyasida qurol-yarog‘ zaxiralarining qisqarish sur’atlari nazorat ko‘rsatkichlaridan 15 foizga oshib ketgan.
Ukrainaga yetkazib berilgan qurol-yarog‘ o‘rnini to‘ldirish uchun AQSH hukumati prezidentning maxsus vakolatlari doirasida 2,6 milliard dollarlik shartnomalar tuzdi. Ushbu vakolatlar favqulodda vaziyat yuzaga kelgan taqdirda tezkorlik bilan, kongress tasdig‘isiz harakat qilish imkonini beradi. Shu bilan birga, o‘tgan bir oy ichida qariyb 1 milliard dollarlik shartnomalar tuzilgan (asosan o‘q-dori va raketalar bo‘yicha).
AQSH harbiy yordam doirasida Ukrainaga yetkazib berishni va’da qilgan ba’zi qurol-yarog‘ va o‘q-dorilar zaxiralarining kamayishi muammosiga duch kelgani haqida CNN noyabr o‘rtalarida hukumatdagi bir nechta manbalariga tayanib xabar bergan edi.
Hozircha zaxiralari qisqarib ketgan qurollar va o‘q-dorilar ishlab chiqarishni tezkorlik bilan yo‘lga qo‘yish, shuningdek, ularni Yevropadagi ittifoqdoshlaridan so‘rash imkoniyati bo‘lmayapti, deyilgandi xabarda.
AQSH — Ukrainaning asosiy ittifoqchilaridan biri. Urush boshlanganidan keyin Amerika Ukrainaga bir necha marta ko‘p milliardlik harbiy yordam paketlarini ajratdi, shuningdek, u uchun ijara yoki uzoq vaqt bo‘lib-bo‘lib to‘lash sharti bilan qurol-yarog‘ yetkazib berish imkonini beruvchi lend-liz dasturini ishga tushirdi.
AQSH mudofaa vaziri Lloyd Ostin AQSH Ukrainaga 20 milliard dollardan ortiq harbiy yordam ko‘rsatgani va qancha vaqt kerak bo‘lsa, shuncha vaqt Kiyevni qo‘llab-quvvatlashda davom etishini aytgandi.
Izoh (0)