Indoneziyadagi zilzila qurbonlari soni 252 kishiga yetdi, deb xabar bermoqda Daily Mail.
Vayronalar ostidan omon qolganlarni qidirish ishlari ikkinchi kun davom etmoqda. Qutqaruvchilar zilzila qurbonlari soni yanada ortishi mumkinligini aytdi.
Kamida 30 kishi bedarak yo‘qolgan, 377 kishi jarohatlangan. Zilzila epitsentriga yaqin Chanjur shahriga 22-noyabr kuni ertalab ekskavatorlar, yuk mashinalari va boshqa og‘ir texnikalar yetib kelgan.
Rasmiylar, shuningdek, 7060 nafar aholi evakuatsiya qilinganini ma’lum qildi. Bundan tashqari, zilzila oqibatida yana 600 kishi yengil tan jarohati olgan.
“Biz qurbonlar bo‘lishi mumkin bo‘lgan bir qancha joylarda operatsiyalarni maksimal darajada faollashtirdik. Jamoamiz chekka hududlarga yetib borishga ham urinmoqda. Biz uchun barcha qurbonlar ustuvor, maqsadimiz ularni imkon qadar tezroq topish va hayotni saqlab qolish, ularni evakuatsiya qilish va tibbiy yordam ko‘rsatish”, — dedi Milliy qidiruv va qutqaruv agentligi rahbari Anri Alfiandi.
Eslatib o‘tamiz, 21-noyabr kuni Indoneziyaning G‘arbiy Yava hududida, poytaxt Jakartadan 72 kilometr janubda joylashgan Chanjur shahri yaqinida 5,6 magnitudali zilzila sodir bo‘ldi. Avvalroq 162 kishi halok bo‘lgani haqida xabar berilgan edi.
Izoh (0)