“Mudofaa vazirligiga 40 ta vertolyot yetkazib berdik” — Airbus vitse-prezidenti kompaniyaning O‘zbekistondagi biznesi haqida

Fransiya poytaxti Parij shahrida 18–19-noyabr kunlari o‘tkazilgan O‘zbekiston—Fransiya biznes forumi doirasida Airbus kompaniyasi vitse-prezidenti Vuter Van Versh O‘zbekistondagi biznes qanday boshlangani, mamlakatdagi sarmoyaviy muhitga munosabati va boshqa jihatlar haqida fikr bildirdi.

O‘zbekiston — fantastik mamlakat. Shu yilning aprel oyida u yerga bordim. Bu Airbus uchun katta voqea bo‘ldi. Bizni yaxshi kutib olishdi, juda yaqin tutishdi o‘zlariga. Va, albatta, biz yana ham ko‘proq sarmoya kiritmoqchimiz.

Oktabr oyida O‘zbekiston Mudofaa vazirligiga 40 ta vertolyot yetkazib berdik. Va biz hozirda sekin-astalik bilan Uzbekistan Airways’ga Airbus A320neo samolyotlarini yetkazib bermoqdamiz. Shuningdek, koinot borasida ham hamkorlik qilyapmiz. Biz yer maydonlarini tahlil qiladigan bir qancha texnologiyalar ishlab chiqdik va O‘zbekiston bundan agrokulturani rivojlantirishda foydalanyapti. Aytishim mumkinki, xilma-xil loyihalar davom etyapti. Kelajak uchun juda ko‘p imkoniyatlar bor, — deydi u.Kompaniya vitse-prezidenti, shuningdek, O‘zbekistondagi investitsion muhit haqida ham fikr bildirdi.

Sharoitlar yaxshi. Biz kompaniya sifatida mahsulot yetkazib beryapmiz. Lekin men uchun yana bir muhim jihat ta’lim va odamlar hisoblanadi. So‘nggi bor O‘zbekistonda borganimda Transport universitetida bo‘ldim, katta nutq qildim. Bildimki, O‘zbekistonda juda ko‘p iqtidorli yoshlar bor. Shunday ekan, Airbus mamlakat bilan hamkorlikda davom etadi. Investitsion sharoit haqidagi fikrlarim ijobiy. Mana, hozir ikki tomonlama uchrashuvlar bo‘lyapti, keyingi haftada prezidentingizning tashrifi kutilmoqda. Aytmoqchimanki, hamkorlikni yanada kengaytirishga ajoyib imkoniyatimiz bor.

O‘zbekiston va Fransiya o‘rtasidagi munosabatlar yaxshi. Turli madaniy va siyosiy aloqalar mavjud. Shunday ekan, Fransiya mamlakatingiz rahbarini kutib olishni juda intiqlik bilan kutmoqda, — deydi Vuter Van Versh.Mavzuga doir: “Biznesimizni yanada kengaytirish niyatidamiz” — Airbus aviakompaniyasi vitse-prezidenti O‘zbekistonga investitsiya kiritish haqida