Tojikiston MDH mamlakatlari orasida ingliz tilini bilish darajasi eng past deb topildi. O‘zbekiston ham quyi o‘rinda

Tojikiston ingliz tilini bilish darajasi bo‘yicha EF English Proficiency Index reytingida 110 davlat orasida 106-o‘rinni egalladi.

Indeks dunyoning 100 ta mamlakati va mintaqalaridan ingliz tili ona tili bo‘lmagan 2 milliondan ortiq odam o‘rtasida o‘tkazilgan so‘rovnomaga asoslanadi. Respondentlar EF SET testini topshirgan.

Mutaxassislar Tojikistonni Mustaqil Davlatlar Hamdo‘stligi mamlakatlari orasida ingliz tilini bilish darajasi eng past davlat deb qayd etdi. Reytingda Niderlandiya yetakchilik qilmoqda. Keyingi o‘rinlarda Singapur va Avstriya turibdi.

Sobiq SSSR mamlakatlari orasida ingliz tilini bilish darajasi bo‘yicha yuqori uchlikni Boltiqbo‘yi davlatlari egalladi — Litva (19-o‘rin), Latviya (25) va Estoniya (26-). O‘rtacha ko‘rsatkich toifasiga Ukraina (35), Belarus (39), Rossiya (40), Moldova (42), Gruziya (45), Armaniston (57) kiradi.

88-o‘rindan keyingi davlatlar “Ingliz tilini bilish darajasi juda past” mamlakatlar hisoblanadi, bular orasida O‘zbekiston (89), Qirg‘iziston (91), Ozarbayjon (92), Qozog‘iston (99), Tojikiston (106) bor.