Rossiya Mudofaa vazirligi asirga olingan rus askarlarini Ukraina harbiylari o‘ldirganini ma‘lum qildi. Bu bo‘yicha vazirlikning tegishli bayonoti e’lon qilindi.
Mazkur holat aks etgan kadrlar ijtimoiy tarmoqlarda keng tarqalgan.
“Ukrainalik harbiy xizmatchilarning qurolsiz rossiyalik harbiy asirlarni qirg‘in qilishiga oid yangi video dalillar Zelenskiy boshchiligidagi hozirgi Kiyev rejimi va uni himoya qilayotganlarning vahshiyligini tasdiqlaydi. O‘ndan ortiq rossiyalik harbiylarning boshiga o‘q uzish orqali qasddan o‘ldirish Kiyev rejimining harbiy asirlar huquqlarini hurmat qilishi fonida ‘fojiali istisno’ sifatida taqdim etilishi mumkin emas. Shu bilan birga, joriy haftada asirdagi ukrainalik askarlar harbiy asirlar bilan muomala qilish bo‘yicha Jeneva konvensiyasining barcha talablariga muvofiq saqlanmoqda.
Rossiyalik harbiy asirlarning shafqatsizlarcha o‘ldirilishi birinchi va yagona harbiy jinoyat emas. Bu Ukraina Qurolli kuchlarida keng tarqalgan amaliyot bo‘lib, Kiyev rejimi tomonidan faol qo‘llab-quvvatlanadi va G‘arb homiylari tomonidan e'tiborga olinmagan. Ammo Zelenskiy va uning tarafdorlari qiynoqqa solingan va o‘ldirilgan har bir mahbus uchun javob berishi kerak”, deyiladi Mudofaa bayonotida.
Mazkur bayonot ortidan BMT Inson huquqlari bo‘yicha Oliy komissari boshqarmasi o‘ldirilgan rossiyalik harbiy asirlarning videolarini tekshirayotganini ma’lum qildi.
Izoh (0)