Bayden ma’muriyati AQSH sudiga saudiyalik jurnalist Jamol Qoshiqchining o‘ldirilishi bilan bog‘liq ishda Saudiya Arabistoni valiahd shahzodasi Muhammad bin Salmonga daxlsizlik berilishi kerakligini e’lon qildi. Bu haqda The Guardian xabar berdi.
Ma’lum qilinishicha, bu Saudiya valiahd shahzodasini 2018-yildagi qotillik uchun qonuniy javobgarlikka tortishga qaratilgan so‘nggi urinishga barham beradi. Bayden ma’muriyati hujjatida Muhammad bin Salmonning yaqinda bosh vazir lavozimiga ko‘tarilgani uning “hozirgi hukumat rahbari ekani va qonuniy da’voda himoyalanganini” anglatadi.
“AQSH hukumati Jamol Qoshiqchining o‘ldirilishidan jiddiy xavotir bildirdi va buni Saudiya hukumatining ochiq hamda yuqori darajalarida e'lon qildi", deyiladi AQSH Adliya vazirligi bayonotida.
Shuningdek, AQSH suiqasd bilan bog‘liq moliyaviy sanksiyalar va viza cheklovlari ham joriy qilgani keltirib o‘tiladi.
“Biroq Saudiya valiahd shahzodasining daxlsizlik doktrinasi xalqaro huquqda mustahkam o‘rnatilgan va uzoq yillik ijro amaliyotida doimiy ravishda maqomga asoslangan qaror sifatida e‘tirof etilgan” deyiladi bayonotda.
Bayden ma’muriyati arizasiga AQSH Davlat departamentining yuridik maslahatchisi vazifasini bajaruvchi Richard Visekning Adliya vazirligiga sudga “daxlsizlik taklifi”ni taqdim etishni ko‘rsatgan xati ilova qilingan.
Huquqiy ekspertlarning ta’kidlashicha, AQSH hukumatining pozitsiyasi sudya Jon Beytsni shahzoda Muhammad bin Salmon va uning gumon qilinayotgan sheriklariga Qoshiqchining o‘ldirilishi bilan bog‘liq fuqarolik ishini rad etishiga olib keladi.
2022-yil iyul oyida AQSH prezidenti Bayden Muhammad bin Salmon bilan uchrashib, uni Jamol Qoshiqchini o‘ldirishda ayblagandi. Saudiya valiahd shahzodasi esa AQSH prezidentiga jinoyat uchun shaxsan javobgar emasligini aytgan. Biroq Bayden uni bu masalada aybor deb hisoblashini ta’kidlagandi.
Jamol Qoshiqchining o‘limi tafsilotlari
Jamol Qoshiqchi 2018-yil oktabr oyida Saudiya Arabistonining Istanbuldagi konsulligida Ar-Riyod maxsus kuchlari tomonidan o‘ldirilgan. Jurnalistning jasadi esa topilmagan. Muhammad bin Salmon sodir bo‘lgan voqea uchun javobgarlikni o‘z zimmasiga olgan, biroq u jurnalistning o‘limiga buyruq bermaganini ta’kidlagan.
Saudiya Arabistoni sudi 2019-yil dekabr oyida Qoshiqchi qotilligi ishi bo‘yicha besh kishini o‘limga hukm qilgan. Yana uch kishi jinoyatni yashirishga uringanlikda ayblanib, jami 24-yilga ozodlikdan mahrum etilgan.
Mavzuga doir:
Izoh (0)