Niderlandiya Tashqi ishlar vazirligi Rossiya elchisi Aleksandr Shulginni Moskvaning Malayziyadagi Boeing MH17 halokati bo‘yicha chiqarilgan hukmga munosabati sababli huzuriga chaqirtirdi. Bu haqda “RIA Novosti” xabar berdi.
“Rossiya o‘z munosabati bilan Niderlandiya huquqiy davlatini obro‘sizlantiradi. Buni mutlaqo qabul qilib bo‘lmaydi', — deyiladi Niderlandiya TIV bayonotida.
17-noyabrda Niderlandiya sudi ikki nafar rossiyalik Igor Girkin (Strelkov) va Sergey Dubinskiyni hamda ukrainalik Leonid Xarchenkoni 2014-yil Malaysia Airlines yo‘lovchi laynerini halokatga uchratganlikda aybdor deb topdi. Hodisada 298 kishi halok bo‘lgandi. Ayblanuvchilarga umrbod qamoq jazosi tayinlandi. Ular qurbonlarning yaqinlariga kamida 16 million yevro tovon puli to‘lashi kerak.
Rossiya prezidenti matbuot kotibi Dmitriy Peskov Donbassda Malayziyaning Boeing samolyoti urib tushirilgani bo‘yicha Gaaga sudining hukmi “chuqur tahlil”ni talab qilishini aytdi.
“Rossiya olib borilayotgan tergovga kiritilmaganidan afsusdamiz. Ishonchimiz komilki, Rossiya tomonining bu jarayondan chetlatilgani, kamida tergovning xolisligiga hissa qo‘shmagan. Sud qarorining o‘ziga kelsak, avvalo chuqur tahlil qilish zarur”, — degan Peskov.
Gaaga sudi 2014-yilda Malayziya Boeing'i urib tushirilganda o‘zini o‘zi e’lon qilgan Donetsk Rossiya nazorati ostida bo‘lganini ta’kidlagandi. Bu hududda rus qurollaridan foydalanilgan, bundan tashqari rus qo‘shinlari Donbassda jang qilgan. Sud MH17 halokatida “Buk” havo mudofaa tizimidan foydalanishni Rossiya bilan bevosita aloqador deb topmadi.
Izoh (0)