Moldovaning sobiq prezidenti Igor Dodon 2022-yil 18-noyabr kuni bo‘lib o‘tgan sud majlisida uy qamog‘idan ozod etildi. Bu haqda ZDG nashri xabar berdi.
“Dodonni uy qamog‘ida saqlash haqidagi talab rad etilsin. Shu bilan birga, u 60 kun davomida sud nazorati ostida bo‘ladi. Bu vaqt ichida unga mamlakatdan chiqib ketish taqiqlanadi”, — deya sudya hukmni o‘qib eshittirdi.
Moldova sobiq prezidenti may oyida hibsga olingan edi. Iyun oyida u “Energokom”ga qarshi qo‘zg‘atilgan jinoiy ish doirasida “uyushgan jinoiy guruhlar manfaatini ko‘zlab” mansab vakolatlarini suiiste’mol qilganlikda ayblangan.
U uyi, idoralari, ota-onasining uyi va boshqa binolarida uzoq davom etgan tintuvlardan so‘ng hibsga olingan. Sobiq prezident Jinoyat kodeksining to‘rt moddasi bo‘yicha ayblangan: passiv korrupsiya, siyosiy partiya tomonidan jinoiy tashkilotdan mablag‘ olish, noqonuniy boyib ketish va davlatga xiyonat.
Dodon va uning partiyasi unga nisbatan qo‘zg‘atilgan jinoiy ishni prezident Mayya Sandu tomonidan siyosiy repressiya va muxolifatga bosim o‘tkazish sifatida baholamoqda.
Igor Dodon 2006 yildan 2009 yilgacha davlat lavozimlarida ishlagan, 2016 yildan 2020 yilgacha prezident bo‘lgan.
Izoh (0)