Shvetsiya tergovchilari shikastlangan “Shimoliy oqim 1” va “Shimoliy oqim 2” gaz quvurlarida portlovchi moddalar izlarini topdi. Bu haqda mamlakat prokuraturasi saytidagi bayonotga tayanib Forbes xabar bermoqda.
Prokuror Mats Lyungkvistning so‘zlariga ko‘ra, o‘tkazilgan tekshiruvlar topilgan bir nechta ashyolarda portlovchi moddalar izlari borligini ko‘rsatdi. Yanada aniqroq xulosalar chiqarish imkonini beruvchi ilg‘or tadqiqotlar davom etmoqda.
Dastlabki tergov murakkab va keng qamrovli bo‘lib, u qo‘poruvchilik sodir etishda gumon qilinayotgan shaxslarni aniqlash mumkinmi yoki yo‘qligini ko‘rsatishi kerak, — deyiladi prokuratura bayonotida.
Ikkala “Shimoliy oqim”da ham avariyalar sentabr oyi oxirida sodir bo‘lgan. Shvetsiya va Daniya seysmologlari kuchli portlashlar haqida xabar bergan.
“Gazprom” quvurlarga misli ko‘rilmagan zarar yetkazilganini e’lon qildi. Gazning sizib chiqishi 3-oktabrda to‘liq to‘xtadi.
Shvetsiya va Daniya Germaniya ishtirokidagi hodisa yuzasidan tergov olib bormoqda.
Bu davlatlar rahbarlari avvalroq ushbu hodisalar qasddan qilingan harakatlar natijasida sodir bo‘lgan deb taxmin qilgandi.
Rossiya rasmiylari gaz quvurlarini yo‘q qilish AQSH uchun foydali bo‘lgan deb hisoblamoqda. Prezident Vladimir Putin esa voqeada “anglosakslar”ni aybladi.
Garchi ular bunga aloqador emasligi haqida ma’lumotlar kelib tushayotgan bo‘lsa-da, Rossiya bir necha bor avariyalarni tekshirishni mamlakat ishtirokisiz amalga oshirish mumkin emasligini ta’kidlagan.
Avvalroq Rossiya “Shimoliy oqim”dagi portlashlarga Buyuk Britaniyaning aloqadorligini ma’lum qilgandi.
Izoh (0)