Швеция терговчилари шикастланган «Шимолий оқим 1» ва «Шимолий оқим 2» газ қувурларида портловчи моддалар изларини топди. Бу ҳақда мамлакат прокуратураси сайтидаги баёнотга таяниб Forbes хабар бермоқда.
Прокурор Мац Люнгквистнинг сўзларига кўра, ўтказилган текширувлар топилган бир нечта ашёларда портловчи моддалар излари борлигини кўрсатди. Янада аниқроқ хулосалар чиқариш имконини берувчи илғор тадқиқотлар давом этмоқда.
Дастлабки тергов мураккаб ва кенг қамровли бўлиб, у қўпорувчилик содир этишда гумон қилинаётган шахсларни аниқлаш мумкинми ёки йўқлигини кўрсатиши керак, — дейилади прокуратура баёнотида.
Иккала «Шимолий оқим»да ҳам авариялар сентябрь ойи охирида содир бўлган. Швеция ва Дания сейсмологлари кучли портлашлар ҳақида хабар берган.
«Газпром» қувурларга мисли кўрилмаган зарар етказилганини эълон қилди. Газнинг сизиб чиқиши 3 октябрда тўлиқ тўхтади.
Швеция ва Дания Германия иштирокидаги ҳодиса юзасидан тергов олиб бормоқда.
Бу давлатлар раҳбарлари аввалроқ ушбу ҳодисалар қасддан қилинган ҳаракатлар натижасида содир бўлган деб тахмин қилганди.
Россия расмийлари газ қувурларини йўқ қилиш АҚШ учун фойдали бўлган деб ҳисобламоқда. Президент Владимир Путин эса воқеада «англосакслар»ни айблади.
Гарчи улар бунга алоқадор эмаслиги ҳақида маълумотлар келиб тушаётган бўлса-да, Россия бир неча бор аварияларни текширишни мамлакат иштирокисиз амалга ошириш мумкин эмаслигини таъкидлаган.
Аввалроқ Россия «Шимолий оқим»даги портлашларга Буюк Британиянинг алоқадорлигини маълум қилганди.
Изоҳ (0)