Tom Ford’ning kosmetika giganti Estée Lauder’ga sotilishi brend asoschisi Tom Fordni milliarderga aylantiradi. Bu haqda Forbes xabar bermoqda.
Amerikaning Forbes nashri ma’lumotlariga ko‘ra, kelishuvdan so‘ng Fordning boyligi 1,2 milliard dollarga baholanishi mumkin.
Estée Lauder kelishuvi Tom Ford brendini 2,8 milliard dollarga baholagan. 2013-yilda chop etilgan hujjatlarga ko‘ra, Ford kompaniyaning deyarli 64 foiziga egalik qilgan va shundan beri uning ulushi o‘zgarmagan.
Butun kompaniya bahosiga ko‘ra, dizaynerning ulushini 1,1 milliard dollarga baholash mumkin. Bundan tashqari, Ford Los-Anjeles va Nyu-Yorkdagi kamida 65 million dollarlik ikkita uyga egalik qiladi.
Forddan tashqari, boshqa investorlar ham brend va modalar uyida ulushlarga ega. Masalan, Italiyaning hashamatli tovarlar sotuvchisi Zegna taxminan 345 million dollarlik 15 foiz ulushga ega.
Fordning uzoq yillik biznes sherigi Domeniko De Sole kompaniyaning 11 foizdan sal ko‘proq ulushiga egalik qiladi, bu ulush hozirda 259 million dollarga baholanmoqda.
Portugaliyaning Grupo Americo Amorim konglomerati qolgan 10 foizga egalik qiladi, bu hozirda 230 million dollarga teng.
Oxirgi yillik hisobotga ko‘ra, Zegna brendning kiyim-kechak va aksessuarlarini ishlab chiqarish uchun uzoq muddatli litsenziyani saqlab qoladi.
2021-yilda Tom Ford 1,7 milliard dollarlik savdodan 96 million dollar foyda ko‘rganini ma’lum qilgan. Brendning oldingi ikki yillik foyda hajmi keltirilmagan.
Hozirda Tom Ford’ning turli mamlakatlarda, jumladan, Xitoy, Italiya, Yaponiya, Shveysariya va Birlashgan Arab Amirliklarida 98 ta do‘koni mavjud.
Estée Lauder 15-noyabr kuni premium kiyim-kechak, poyabzal, parfyumeriya va aksessuarlar brendini sotib olganini e’lon qildi.
Brend va modalar uyi 2,8 milliard dollarga baholandi, Estée Lauder shartnoma shartlariga ko‘ra taxminan 2,3 milliard dollar naqd pul va qarzni to‘lagan.
Shuningdek, 2025-yil iyul oyidan boshlab 300 million dollarga kechiktirilgan to‘lovlarni imzolagan. Bitim 2023-yilning birinchi yarmida yakunlanishi kutilmoqda.
Shartnoma bayonotiga ko‘ra, Ford 2023-yil oxirigacha brendning “ijodiy yuzi” bo‘lib qoladi.
Izoh (0)