McDonald’s Qozog‘istondagi barcha restoranlarini yopadi. Bu haqda kompaniya 17-noyabr kuni ijtimoiy tarmoq sahifalarida ma’lum qilgan, deb yozadi Forbes.
Tarmoq restoranlari 18-noyabr, juma kuni yopiladi. Xabarda aytilishicha, bu “mahalliy yetkazib berishdagi cheklovlar tufayli” sodir bo‘lmoqda.
McDonald’s’ning Qozog‘iston tarmog‘i mamlakatning olti shahrida — Ostona, Olmaota, Atirau, Aqto‘be, Qo‘stanay, Qarag‘andada joylashgan 24 ta restorandan iborat. Tarmoqda 2 mingga yaqin kishi ishlaydi.
McDonald’s Qozog‘istonda 2016-yildan buyon faoliyat yuritadi. 2022-yil bahori holatiga mamlakatning oltita shahrida 23 ta restoran ochilgan.
Forbes mart oyida Rossiyada McDonald’s faoliyati to‘xtatilganidan keyin Qozog‘istondagi tarmoq muammolarga uchrashi mumkinligi, chunki mahsulotlarning yarmidan ko‘pini Qozog‘istondagi restoranlar rossiyalik yetkazib beruvchilardan olishini yozgan edi.
McDonald’s’ning Qozog‘istondagi franchayzisi hisoblangan biznesmen Kayrat Boranbayev mart oyida yirik o‘g‘irlik haqidagi ish bo‘yicha hibsga olingan edi.
Boranbayev SPP kompaniyasiga egalik qilib, u McDonald’s’ning Rossiyadagi Sverdlov, Orenburg, Chelyabinsk, Kurgan, Tyumen va Kirov viloyatlaridagi tarmoqlarini boshqargan.
Tadbirkor Belarus va Qozog‘istondagi McDonald’s franshizasiga egalik qiladi. Shuningdek, “KazRosGaz” sobiq bosh direktori sifatida ham taniqli. Avvalroq “Kommersant”ning ikkita manbasi ham Kayrat Boranbayevning tuzilmalari McDonald’s xususiy obyektlarining yangi egasiga aylanishini taxmin qilgandi.
Kayrat Boranbayev Qozog‘istonning eng boy biznesmenlari ro‘yxatiga kirgan. U mamlakat sobiq prezidenti Nursulton Nazarboyev oilasining a’zosidir: uning qizi Nazarboyevning 2020-yilda vafot etgan nevarasiga turmushga chiqqan edi. 2022-yil bahorida Boranbayev jinoiy ta’qibga uchradi — qishki noroziliklardan keyin Nazarboyev atrofidagi boshqa bir qator odamlar singari. U o‘g‘irlik haqidagi ish bo‘yicha hibsga olingandi.
Izoh (0)