Байден маъмурияти АҚШ судига саудиялик журналист Жамол Қошиқчининг ўлдирилиши билан боғлиқ ишда Саудия Арабистони валиаҳд шаҳзодаси Муҳаммад бин Салмонга дахлсизлик берилиши кераклигини эълон қилди. Бу ҳақда The Guardian хабар берди.
Маълум қилинишича, бу Саудия валиаҳд шаҳзодасини 2018 йилдаги қотиллик учун қонуний жавобгарликка тортишга қаратилган сўнгги уринишга барҳам беради. Байден маъмурияти ҳужжатида Муҳаммад бин Салмоннинг яқинда бош вазир лавозимига кўтарилгани унинг «ҳозирги ҳукумат раҳбари экани ва қонуний даъвода ҳимояланганини» англатади.
«АҚШ ҳукумати Жамол Қошиқчининг ўлдирилишидан жиддий хавотир билдирди ва буни Саудия ҳукуматининг очиқ ҳамда юқори даражаларида эълон қилди", дейилади АҚШ Адлия вазирлиги баёнотида.
Шунингдек, АҚШ суиқасд билан боғлиқ молиявий санкциялар ва виза чекловлари ҳам жорий қилгани келтириб ўтилади.
«Бироқ Саудия валиаҳд шаҳзодасининг дахлсизлик доктринаси халқаро ҳуқуқда мустаҳкам ўрнатилган ва узоқ йиллик ижро амалиётида доимий равишда мақомга асосланган қарор сифатида эътироф этилган» дейилади баёнотда.
Байден маъмурияти аризасига АҚШ Давлат департаментининг юридик маслаҳатчиси вазифасини бажарувчи Ричард Висекнинг Адлия вазирлигига судга «дахлсизлик таклифи»ни тақдим этишни кўрсатган хати илова қилинган.
Ҳуқуқий экспертларнинг таъкидлашича, АҚШ ҳукуматининг позицияси судья Жон Бейцни шаҳзода Муҳаммад бин Салмон ва унинг гумон қилинаётган шерикларига Қошиқчининг ўлдирилиши билан боғлиқ фуқаролик ишини рад этишига олиб келади.
2022 йил июль ойида АҚШ президенти Байден Муҳаммад бин Салмон билан учрашиб, уни Жамол Қошиқчини ўлдиришда айблаганди. Саудия валиаҳд шаҳзодаси эса АҚШ президентига жиноят учун шахсан жавобгар эмаслигини айтган. Бироқ Байден уни бу масалада айбор деб ҳисоблашини таъкидлаганди.
Жамол Қошиқчининг ўлими тафсилотлари
Жамол Қошиқчи 2018 йил октябрь ойида Саудия Арабистонининг Истанбулдаги консуллигида Ар-Риёд махсус кучлари томонидан ўлдирилган. Журналистнинг жасади эса топилмаган. Муҳаммад бин Салмон содир бўлган воқеа учун жавобгарликни ўз зиммасига олган, бироқ у журналистнинг ўлимига буйруқ бермаганини таъкидлаган.
Саудия Арабистони суди 2019 йил декабрь ойида Қошиқчи қотиллиги иши бўйича беш кишини ўлимга ҳукм қилган. Яна уч киши жиноятни яширишга уринганликда айбланиб, жами 24 йилга озодликдан маҳрум этилган.
Мавзуга доир:
Изоҳ (0)