Istanbul markazidagi Istiqlol ko‘chasida portlash uyushtirgan terrorchilar Suriyaning Manbija shahridan ko‘rsatma olgan, dedi Turkiya ichki ishlar vaziri Sulaymon Soylu hukumat komissiyasi yig‘ilishida.
“Mersin va Istiqlol ko‘chasiga hujum Manbijdan turib uyushtirilgan”, — dedi Turkiya ichki ishlar vaziri.
Soyluning so‘zlariga ko‘ra, o‘tgan 12 oy ichida mamlakat xavfsizlik kuchlari 200 ta teraktni, jumladan 18 tasi xudkush terrorchilikning oldini olgan. Unga ko‘ra, qo‘lga olingan 1 248 nafar terrorchidan 393 nafari “Kurdiston ishchilar partiyasi” a’zosi ekanini aytgan. Bu partiya Anqarada terrorchi tashkilot deb hisoblanadi.
Soylu Istiqlol ko‘chasidagi teraktni “Kurdiston partiyasining tinch aholiga qarshi tipik hujumi” deb atadi. “Biz o‘sha paytdayoq jinoyatchini topgandik, hozir uning ortida turgan butun tuzilmani o‘rganmoqdamiz. Buning ortida ‘Kurdiston ishchilar partiyasi’ni qo‘llab-quvvatlaydigan AQSH turibdi”, — dedi Turkiya IIV rahbari.
Vazir aytayotgan Mersindagi terakt 27-sentabr kuni politsiya binosi yonida sodir bo‘lgan edi. IIV ma’lumotlariga ko‘ra, huquq-tartibot xodimlari niqobi ostida kurd terrorchilari politsiya binosiga kirishga uringan, ularni qo‘lga olish chog‘ida otishma boshlangan. Bir nafar politsiyachi halok bo‘lgan.
Istanbul markazidagi mashhur sayyohlik ko‘chasi Istiqlolda esa 13-noyabr kuni portlash sodir bo‘ldi. Olti kishi halok bo‘ldi, kamida 81 kishi, jumladan, O‘zbekiston fuqarosi jarohat oldi. Istanbul Bosh prokuraturasi portlashni terakt deb baholadi.
Jinoyatga aloqadorlikda gumon qilinib, 50 kishi, jumladan Suriya fuqarosi Ahlam Albashir qo‘lga olindi — ayol bombani Istiqlol ko‘chasiga qo‘yib, uni portlatgani aytilmoqda. Politsiya Albashirning “Kurdiston ishchilar partiyasi” bilan aloqasi borligini da’vo qilmoqda. Partiyaning o‘zi bu teraktga aloqadorligini rad etib, tinch aholiga hujum qilmasligini ta’kidlamoqda.
Izoh (0)