Rossiyaning Ukrainaga keng ko‘lamli qurolli tajovuzi oqibatida 18-noyabr holatiga ko‘ra, 433 nafar bola halok bo‘lgan, 837 nafardan ortig‘i turli og‘irlikdagi jarohatlar olgan. Bu raqamlar yakuniy emas, chunki faol harbiy harakatlar zonasida, vaqtincha bosib olingan va ozod qilingan hududlarda qurbonlarni aniqlash davom etmoqda. Bu haqda Ukraina Bosh prokuraturasi xabar berdi.
Hisobotda oxirgi ikki kun ichida halok bo‘lgan va yaralangan bolalar haqidagi ma’lumotlar ham keltirilgan.
“17-noyabr kuni Zaporojye viloyatining Volnyansk shahridagi xususiy uyga dushmanning raketa hujumi oqibatida 10 kishi halok bo‘ldi. Ular orasida 11 va 17 yoshli ikki bola ham bor. 16-noyabr kuni Xarkov viloyatida Rossiya qo‘shinlari tomonidan Izyum shahri o‘qqa tutilishi oqibatida 11 yoshli qiz yaralandi. 17-noyabr kuni Dnepr shahrining o‘qqa tutilishida 15 yoshli qiz ham yaralangan”, — deyiladi xabarda.
Bosh prokuratura, shuningdek, Ukrainadagi portlashlar va o‘qqa tutishlar oqibatida 2 719 ta ta’lim muassasasi zarar ko‘rgani, ulardan 332 tasi butunlay vayron bo‘lganini qayd etdi.
Izoh (0)