Yevropa komissiyasi (YK) ijrochi vitse-prezidenti Frans Timmermansning aytishicha, Yevropa Ittifoqi va uning qator a’zolari Afrikaga iqlim o‘zgarishiga moslashish uchun 1 milliard yevrodan ortiq yordam ajratadi.
“Yevropa Ittifoqi va unga a’zo to‘rt davlat — Fransiya, Germaniya, Niderlandiya va Daniya — Afrikada adaptatsiyani qo‘llab-quvvatlash uchun 1 milliard yevrodan ortiq mablag‘ ajratadi”, — dedi YK vitse-prezidenti Sharm al-Shayxda bo‘lib o‘tgan BMTning iqlim bo‘yicha COP27 konferensiyasida.
Timmermans bayonotida tushuntirilganidek, bunday tashabbusdan iqlim xatarlari haqida ma’lumot to‘plash, yaqinlashib kelayotgan ofatlardan erta ogohlantirish tizimlarini kuchaytirish va iqlim o‘zgarishini bartaraf etish uchun mablag‘larni, shu jumladan xususiy mablag‘larni to‘plashga yordam berish uchun foydalanilishi kerak. Bundan tashqari, ajratilayotgan mablag‘lar muqarrar xavflardan sug‘urtalash mexanizmlarini mustahkamlaydi.
Vitse-prezident iqlim o‘zgarishidan ko‘rilgan yo‘qotishlar va zararlarga ham e’tibor qaratdi. “Bugun Yevropa Ittifoqi tomonidan ajratilishi e’lon qilingan pulning bir qismi yo‘qotishlar va zararlarni qoplashga yo‘naltiriladi. Ayrim a’zo davlatlarimiz tomonidan bu borada allaqachon tegishli va’dalar berilgan”, — dedi Timmermans.
U buning uchun tashabbusga YI budjetidan 60 million yevro qo‘shilishini ma’lum qildi.
Izoh (0)