AQSH prezidenti Jo Bayden Ukraina prezidenti Vladimir Zelenskiyning Polshaga qulagan raketalar Ukrainaga tegishli emasligi haqidagi bayonotiga munosabat bildirdi.
“Bu dalil emas”, — dedi Amerika rahbari.
16-noyabr kuni kechqurun Zelenskiy jurnalistlar bilan suhbatda raketalar Ukrainaga tegishli emasligini aytgandi.
“Bu jiddiy voqea. Bu bizning raketamiz yoki raketa zarbamiz emasligiga shubha qilmayman. Ishonchim komilki, bu bo‘yicha olib borilayotgan tergovda ishtirok etishimiz kerak. Adolatli bo‘lishimizni xohlayman. Agar raketa Ukraina havo mudofaasiga tegishli bo‘lsa, bu dalillarni ko‘rmoqchiman. Avvalambor bizga tergovga qo‘shilishga va sizda bor ma’lumotlar bilan tanishishga ruxsat bering”, — dedi u
15-noyabr kuni Polshaning Ukraina bilan chegaradosh Pshevodov qishlog‘iga raketalar qulagan, oqibatda 2 kishi halok bo‘lgan edi. Bu voqea Ukraina hududi ommaviy raketa zarbalariga uchragan kuni yuz berdi.
Dastlab, Associated Press agentligi Amerika razvedkasidagi manbaga tayanib, Polshaga qulagan raketalar Rossiyaga tegishli bo‘lishi mumkinligi haqida xabar bergandi. Polsha Tashqi ishlar vazirligi ham ularning “Rossiyada ishlab chiqarilgan”ini tasdiqlagan. Shu bilan birga, Polsha prezidenti Anjey Duda Varshavada raketalarni kim uchirgani haqida ma’lumot yo‘qligini ta’kidladi.
Pentagon matbuot kotibi Pet Rayder jurnalistlarga raketalarning kimga tegishli ekanini hali tasdiqlay olmasligini aytgan. AQSH prezidenti Jo Bayden ham ularning Rossiyadan uchirilgani hozircha rad etilayotgani haqida gapirdi.
Keyinroq AP 3 nafar amerikalik rasmiyga tayanib, Polshada qulagan raketalar Rossiya raketalarini urib tushirish uchun Ukraina Qurolli kuchlari tomonidan otilgan, deb xabar berdi.
O‘z navbatida Rossiya Mudofaa vazirligi ham raketalar Ukraina armiyasiga qarashli deb da’vo qilmoqda.
Izoh (0)