Senat raisi Tanzila Norboyeva Better Cotton Initiative (BCI) xalqaro tashkilotining bosh direktori Alan MakKley bilan uchrashdi. Bu haqda Senat axborot xizmati xabar berdi.
Tanzila Norboyevaning so‘zlariga ko‘ra, O‘zbekistonda paxta va to‘qimachilik sanoatida keng ko‘lamli tizimli ishlar amalga oshirilmoqda. Better Cotton Initiative (BCI) xalqaro tashkilotining bosh direktori Alan MakKley bilan konstruktiv uchrashuv hamda kompaniyaning O‘zbekistondagi faoliyatiga bag‘ishlangan davra suhbatida davomida aynan ushbu sohadagi o‘zaro hamkorlikni rivojlantirish bo‘yicha fikr almashildi.
Odam savdosi va majburiy mehnatga qarshi kurashish borasida amalga oshirilgan islohotlar natijasida o‘zbek paxtasiga qo‘yilgan boykotning bekor qilinishidan so‘ng xalqaro brend va yirik kompaniyalar mahalliy korxonalar bilan hamkorlik qilishga intilmoqda.
O‘zbekiston dunyoning yirik brendlari kabi to‘qimachilik sanoatida mahsulot ishlab chiqarish va realizatsiya qilishda barqaror paxta xom ashyosidan, jumladan, BCI standartlari tizimiga muvofiq yetishtirilgan paxtadan foydalanishi muhimdir.
BCI bosh direktori Alan MakKley va uning butun jamoasiga yordam va yaqin hamkorlik uchun minnatdorchilik bildiraman. Ishonchim komilki, BCI tajribasi nafaqat respublikada paxta xom ashyosi ishlab chiqarish tizimini yuqori xalqaro darajaga ko‘tarishga, balki jahon brendlarini o‘zbek to‘qimachiligiga keng jalb etishga ham xizmat qiladi, — deydi Senat raisi.
Ma’lumot o‘rnida, BCI “paxta dalasidan sotuvgacha” bo‘lgan butun ishlab chiqarish jarayonini sertifikatlash bilan shug‘ullanadi. Tashkilotning mingdan ortiq a’zosi mavjud bo‘lib, ular qatoriga H&M, Gap, IKEA, Levi Strauss, Zara, Hugo Boss, Adidas, Puma kabi 80 dan ziyod dunyoning eng yirik brendlari ham kiradi.
Mavzuga doir:
Izoh (0)