Сенат раиси Танзила Норбоева Better Cоtton Initiative (BCI) халқаро ташкилотининг бош директори Алан МакКлей билан учрашди. Бу ҳақда Сенат ахборот хизмати хабар берди.
Танзила Норбоеванинг сўзларига кўра, Ўзбекистонда пахта ва тўқимачилик саноатида кенг кўламли тизимли ишлар амалга оширилмоқда. Better Cоtton Initiative (BCI) халқаро ташкилотининг бош директори Алан МакКлей билан конструктив учрашув ҳамда компаниянинг Ўзбекистондаги фаолиятига бағишланган давра суҳбатида давомида айнан ушбу соҳадаги ўзаро ҳамкорликни ривожлантириш бўйича фикр алмашилди.
Одам савдоси ва мажбурий меҳнатга қарши курашиш борасида амалга оширилган ислоҳотлар натижасида ўзбек пахтасига қўйилган бойкотнинг бекор қилинишидан сўнг халқаро бренд ва йирик компаниялар маҳаллий корхоналар билан ҳамкорлик қилишга интилмоқда.
Ўзбекистон дунёнинг йирик брендлари каби тўқимачилик саноатида маҳсулот ишлаб чиқариш ва реализация қилишда барқарор пахта хом ашёсидан, жумладан, BCI стандартлари тизимига мувофиқ етиштирилган пахтадан фойдаланиши муҳимдир.
BCI бош директори Алан МакКлей ва унинг бутун жамоасига ёрдам ва яқин ҳамкорлик учун миннатдорчилик билдираман. Ишончим комилки, BCI тажрибаси нафақат республикада пахта хом ашёси ишлаб чиқариш тизимини юқори халқаро даражага кўтаришга, балки жаҳон брендларини ўзбек тўқимачилигига кенг жалб этишга ҳам хизмат қилади, — дейди Сенат раиси.
Маълумот ўрнида, BCI «пахта даласидан сотувгача» бўлган бутун ишлаб чиқариш жараёнини сертификатлаш билан шуғулланади. Ташкилотнинг мингдан ортиқ аъзоси мавжуд бўлиб, улар қаторига H&M, Gap, IKEA, Levi Strauss, Zarа, Hugo Boss, Adidas, Puma каби 80 дан зиёд дунёнинг энг йирик брендлари ҳам киради.
Мавзуга доир:
Изоҳ (0)