“Daryo” nashri 17-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Putin Zelenskiy bilan to‘g‘ridan to‘g‘ri muzokaralar o‘tkazmoqchi
Ukraina prezidenti Vladimir Zelenskiy G‘arb hamkorlaridan Rossiya rahbari Vladimir Putinning to‘g‘ridan to‘g‘ri muzokaralar o‘tkazish istagi haqida signal olganini aytdi. Bu haqda “Interfaks” xabar berdi.
“Putin to‘g‘ridan to‘g‘ri muzokaralar o‘tkazishni xohlayotgani haqida signallar oldim. Men ommaviy shakldagi muzokarani taklif qildim, chunki Rossiya ommaviy urush olib bormoqda”, — dedi Zelenskiy Kiyevda jurnalistlar bilan uchrashuvda.
Ayni paytda Rossiya qo‘shinlarining Ukrainaga kirishi fonida mamlakat hukumati davlatni saqlab qolish va harbiy xizmatchilarning ruhini ko‘tarish maqsadida aholini evakuatsiya qilmadi, deb tushuntiradi Vladimir Zelenskiy. “Agar Ukrainada odamlar bo‘lmaganida, biz davlatimizni qo‘ldan bergan bo‘lardik”, — degan prezident.
Uning aytishicha, Kiyevga birinchi raketa hujumidan keyin shaharning barcha aholisini evakuatsiya qilish, do‘konlar, infratuzilmani yopish va elektr energiyasini o‘chirish taklifi o‘rtaga tashlangan. Zarbalar butun mamlakat bo‘ylab berila boshlaganda esa, u Ukrainaning barcha aholisini qayerga evakuatsiya qilish mumkinligini so‘ragan: “Xo‘sh, qayerga? Polshagami? Slovakiya? Ruminiyaga? Qayerga?”.
Mamlakat prezidenti harbiylar Ukrainani saqlab qolish uchun kurashayotganini, Ukraina esa oilalar va yerdan iborat ekanini ta’kidladi. “Agar odamlar ketadigan bo‘lsa, kimni himoya qilish kerak bo‘ladi?”, — deb so‘radi u. “Mamlakat prezidenti: qoch, yugur, men ham sen bilan qochaman, desa nima bo‘lardi, bilmayman”,“Kechirasiz, bu tirik qalqon degani emas, yo‘q, bu boshqa masala”, — deya so‘zini tugatgan Ukraina prezidenti.
Rossiya Ukrainaga qariyb to‘qqiz oy avval, 24-fevralga o‘tar kechasi bostirib kirishni boshlagan edi. Urush boshlanganidan keyin Kiyev Zelenskiy mamlakatda “oxirigacha” qolishini ma’lum qildi.
AQSH Xitoyning harbiy sohada dunyoda birinchilikni egallashiga yo‘l qo‘ymaydi — Pentagon
Hozir Xitoy AQSH uchun eng katta geosiyosiy da’vat hisoblanadi, ammo Vashington Pekinning harbiy sohada dunyo bo‘yicha birinchi o‘rinni egallashiga yo‘l qo‘ymaydi. Bu haqda AQSH Qurolli kuchlari Shtab boshliqlari birlashgan qo‘mitasi raisi Mark Milli aytib o‘tdi, deb yozadi “Interfaks”.
“Xitoyda AQSH uchun ahamiyatli chaqiriqqa aylanish uchun salohiyat bor, va ular, o‘z demografiyasi, texnologiyalari, iqtisodiyoti va boshqa narsalarni hisobga olganda, aslida allaqachon AQSH uchun eng katta geosiyosiy chaqiriq hisoblanadi”, — dedi Milli brifingda.
Biroq uning ta’kidlashicha, AQSH “Xitoy mudofaa sohasida bizdan birinchi o‘rinni olib qo‘yishiga yo‘l bermaydi”. Xitoyliklar “besh yildan keyin ham, o‘n yildan keyin ham, o‘n besh yildan keyin ham” bunga erisha olmaydi, deya qo‘shib qo‘ydi u. “AQSH harbiy sohada hozirgi paytda, shubhasiz, hech qanaqa tanqidlarga qaramasdan, Yer yuzidagi eng halokatli harbiy mashina hisoblanadi”, — deya qo‘shimcha qildi Milli.
Shu bilan birga, Milli Xitoy harbiy sohada, xususan, koinot va kibermakonda faol rivojlanayotganini qayd etdi. Ammo uning so‘zlariga ko‘ra, “Xitoy bunga intilishda davom etsa-da, AQSHnikidan ustunroq armiya yarata olmaydi”.
“O‘zbekiston bizdan 30-40 yil oldinda” — Sadir Japarov
Qirg‘iziston prezidenti Sadir Japarov O‘zbekiston taraqqiyotda respublikadan 30-40 yil oldinda ekanini aytdi. Bu haqda Sputnik xabar berdi.
Japarovning so‘zlariga ko‘ra, O‘zbekiston tomonning “boshi yaxshi ishlaydi”. “Shuning uchun O‘zbekiston bizdan 30-40 yil oldinda. Biz esa hali ham baqirishda (miting qilishda) davom etmoqdamiz. Men samolyotlar, vertolyotlar haqida gapirmayapman, 30 yil ichida biz hatto gugurt ishlab chiqaradigan zavod ham qurmadik”, — dedi Sadir Japarov.
Prezident nutqi Qirg‘iziston parlamenti o‘zbek-qirg‘iz chegarasining alohida uchastkalarini belgilash hamda Kampirobod suv omborining suv resurslarini birgalikda boshqarish to‘g‘risidagi kelishuvni ratifikatsiya qilish fonida yangragan.
Parlament deputatlarining 64 nafari kelishuvni yoqlab, 19 nafari unga qarshi ovoz berdi. Qirg‘iziston prezident Sadir Japarov va Milliy xavfsizlik davlat qo‘mitasi rahbari Qamchibek Tashiyev deputatlarni kelishuvni qo‘llab-quvvatlashga chaqirgan. Parlament yig‘ilishi bahs-munozaralar va tortishuvlar bilan o‘tgan.
Tashiyev kelishuvning qabul qilinishi bilan Qirg‘iziston hududi qariyb 15 ming gektarga kengayishini ta’kidladi. Shu bilan birga, Kampirobod suv ombori ostidagi yerlar O‘zbekistonga o‘tkaziladi.
Eslatib o‘tamiz, yanvar oyida Qozog‘iston prezidenti Qosim-Jo‘mart To‘qayev mamlakat ishbilarmon doiralari vakillari bilan uchrashuvda O‘zbekistonni tilga olgandi. “Biz neft-gaz sohasida SSSR davridan buyon mavjud zavodlarni ta’mirlab kelyapmiz. Bu paytda qo‘shni O‘zbekiston 3-4 ta yangi zavod qurishning uddasidan chiqdi”, — deya munosabat bildirgan Qozog‘iston prezidenti.
Izoh (0)