Yevrokomissiya Yevropa Ittifoqi davlatlarini Bolgariya, Xorvatiya va Ruminiyaning Shengen kelishuviga qo‘shilishini ma’qullash bo‘yicha zarur qarorlarni kechiktirmay qabul qilishga chaqirdi.
Yevrokomissiya bayonotida aytilishicha, ushbu davlatlar Yevropaning vizasiz rejimiga kirish shartlarini bajargan.
Shuningdek, bu davlatlar o‘tgan yillar davomida, jumladan, pandemiya davrida va yaqinda Ukrainadagi voqealarning “misli ko‘rilmagan oqibatlari”ga duch kelganda Shengen hududining normal faoliyatiga katta hissa qo‘shgan.
Bolgariya, Xorvatiya va Ruminiya 2023-yildan boshlab Shengen hududiga qo‘shilish harakatida. Hozir bu hudud Yevropa Ittifoqining 22 mamlakati (Avstriya, Belgiya, Daniya, Finlyandiya, Fransiya, Germaniya, Gretsiya, Italiya, Lyuksemburg, Niderlandiya, Portugaliya, Ispaniya, Shvetsiya, Chexiya, Estoniya, Vengriya, Latviya, Litva, Malta, Polsha, Slovakiya, Sloveniya) va Yevropa Ittifoqiga a’zo bo‘lmagan to‘rtta davlatni (Norvegiya, Islandiya, Shveysariya va Lixtenshteyn) o‘z ichiga oladi. Shengen davlatlari ro‘yxati oxirgi marta o‘n yildan ko‘proq vaqt oldin, Lixtenshteyn unga qo‘shilganida yangilangan edi.
Izoh (0)