Qirg‘iziston parlamenti (Jogorku Kenesh) deputati Janibek Qidiqboyev mamlakatda TikTok ijtimoiy tarmog‘ini bloklashni taklif qildi. Bu haqda Sputnik xabar berdi.
Uning so‘zlariga ko‘ra, TikTok bolalarga salbiy ta‘sir ko‘rsatadi.
“TikTok’da qanday reklamalar berilayotganini o‘zingiz ko‘rasiz. Narkomaniya, spirtli ichimlik reklama qilinadi, tanalar ham ko‘rsatiladi. Qirg‘iz mentalitetiga to‘g‘ri kelmaydigan narsalarni e’lon qiladi. Bu bolalarga qanday zarar yetkazishi mumkinligini ko‘ryapsizmi, tahlil qilasizmi? Balki, TikTok’ni yopish kerakdir?”, — dedi deputat.
Qirg‘iziston madaniyat, axborot, sport va yoshlar siyosati vazirining o‘rinbosari Chingiz Esengul parlamentariylar bilan shaxsiy uchrashuvda bu borada o‘z fikrini bildirishini aytdi.
“Agar ota-onalar farzandlariga smartfon bermasa yoki ularni nazorat qilsa, yomon hodisalar yuz bermasdi. Har yili tadbirlar o‘tkazamiz, chora ko‘ramiz”, — dedi vazir o‘rinbosari.
Qidiqboyevning so‘zlariga ko‘ra, agar ijtimoiy tarmoqqa kirish yopilsa, “odamlar mentalitetiga mos” o‘quv materiallarini chop etish kerak bo‘ladi. Bu TikTok’ni bloklashni taklif qilayotgan parlamentning birinchi deputati emas, xususan Nodira Narmatova ham shunday taklif bergandi.
Ma’lumot o‘rnida, Afg‘onistonda “Tolibon” TikTok’dan foydalanishni taqiqlagan. Bundan tashqari, axloqsiz mazmundagi kanal va ko‘rsatuvlar faoliyatiga chek qo‘yish topshirilgan.
TikTok — asosiy auditoriyasi yoshlar bo‘lgan platforma: foydalanuvchilarning o‘rtacha yoshi 20-24 yoshni tashkil qiladi. Ushbu ijtimoiy tarmoq Xitoyda ishlab chiqarilgan va u yerda eng ko‘p ommalashgan. Shuningdek, undan foydalanuvchilar soni bo‘yicha yetakchi davlatlar qatorida Afg‘onistonning qo‘shnisi Pokiston ham bor — u yerda 19 milliondan ortiq faol foydalanuvchi ro‘yxatga olingan.
Izoh (0)