Chexiya parlamentining quyi palatasi — Chexiya deputatlar palatasi “Rossiyaning amaldagi rejimini terrorchi rejim” deb atagan rezolyutsiyani qabul qildi, deb yozadi Meduza.
“Yevropa Kengashi Parlament assambleyasi rezolyutsiyasiga muvofiq, Deputatlar palatasi Rossiyaning hozirgi siyosiy rejimini terroristik rejim sifatida tavsiflaydi”, — deyiladi 15-noyabrdagi rezolyutsiyada.
Qarorni majlisda ishtirok etgan 156 deputatdan 129 nafari ma’qullab ovoz berdi. Deputatlar palatasining hisobotida qayd etilishicha, “Ozodlik va to‘g‘ridan to‘g‘ri demokratiya” yevroskeptik muxolifat partiyasining barcha 14 nafar vakili bunga qarshi chiqqan.
Rezolyutsiyani qo‘llab-quvvatlagan deputatlar Rossiyaning Ukrainadagi tajovuzini, jumladan, elektr, suv yoki issiqlik ta’minotida uzilishlarga olib keladigan fuqarolik va energetika infratuzilmalariga ommaviy hujumlarni qoraladi.
Ular, shuningdek, “Ukraina sharqidagi bosib olingan to‘rtta viloyatning Rossiyaga qo‘shilishi bo‘yicha referendum natijalarini” tan olishdan bosh tortdi. Bundan tashqari, deputatlar Rossiya ayblanayotgan harbiy jinoyatlarni tergov qilish uchun xalqaro jinoiy tribunal yaratish taklifini qo‘llab-quvvatladi.
2022-yil boshida Yevropaning bir qancha davlatlari — Litva, Latviya, Estoniya va Polsha parlamentlari turli shakllarda Rossiyadagi siyosiy rejimni terrorchi deb atagan edi. Shunday qilib, Litva Rossiyani “terrorchi davlat”, Latviya Rossiyani terrorizmni qo‘llab-quvvatlovchi davlat, Estoniya “terrorizmga homiylik qiluvchi davlat”, Polsha esa Rossiya hukumatini “terrorchi rejim” deb tan oldi.
Oktabr oyida Yevropa Kengashi Parlament assambleyasi Rossiyaning Ukrainaga nisbatan tajovuzkorligi haqidagi rezolyutsiyasida Yevropa Kengashiga a’zo davlatlarni Rossiyani “terrorchi rejim” deb e’lon qilishga chaqirgan edi.
Izoh (0)