Қирғизистон парламенти (Жогорку Кенеш) депутати Жанибек Қидиқбоев мамлакатда TikTok ижтимоий тармоғини блоклашни таклиф қилди. Бу ҳақда Sputnik хабар берди.
Унинг сўзларига кўра, TikTok болаларга салбий таъсир кўрсатади.
«TikTok’да қандай рекламалар берилаётганини ўзингиз кўрасиз. Наркомания, спиртли ичимлик реклама қилинади, таналар ҳам кўрсатилади. Қирғиз менталитетига тўғри келмайдиган нарсаларни эълон қилади. Бу болаларга қандай зарар етказиши мумкинлигини кўряпсизми, таҳлил қиласизми? Балки, TikTok’ни ёпиш керакдир?», — деди депутат.
Қирғизистон маданият, ахборот, спорт ва ёшлар сиёсати вазирининг ўринбосари Чингиз Эсенгул парламентарийлар билан шахсий учрашувда бу борада ўз фикрини билдиришини айтди.
«Агар ота-оналар фарзандларига смартфон бермаса ёки уларни назорат қилса, ёмон ҳодисалар юз бермасди. Ҳар йили тадбирлар ўтказамиз, чора кўрамиз», — деди вазир ўринбосари.
Қидиқбоевнинг сўзларига кўра, агар ижтимоий тармоққа кириш ёпилса, «одамлар менталитетига мос» ўқув материалларини чоп этиш керак бўлади. Бу TikTok’ни блоклашни таклиф қилаётган парламентнинг биринчи депутати эмас, хусусан Нодира Нарматова ҳам шундай таклиф берганди.
Маълумот ўрнида, Афғонистонда «Толибон» TikTok’дан фойдаланишни тақиқлаган. Бундан ташқари, ахлоқсиз мазмундаги канал ва кўрсатувлар фаолиятига чек қўйиш топширилган.
TikTok — асосий аудиторияси ёшлар бўлган платформа: фойдаланувчиларнинг ўртача ёши 20-24 ёшни ташкил қилади. Ушбу ижтимоий тармоқ Хитойда ишлаб чиқарилган ва у ерда энг кўп оммалашган. Шунингдек, ундан фойдаланувчилар сони бўйича етакчи давлатлар қаторида Афғонистоннинг қўшниси Покистон ҳам бор — у ерда 19 миллиондан ортиқ фаол фойдаланувчи рўйхатга олинган.
Изоҳ (0)