Germaniya va Buyuk Britaniya rasmiylari 15-noyabr kuni Polshaga tushgan raketalarga “Putin urushi” sabab bo‘lganini ma’lum qildi. Bu haqda Reuters xabar berdi.
Balida bo‘lib o‘tgan G20 sammitida Germaniya kansleri Olaf Shols Rossiya urush boshlamasa, Polsha hududiga raketalar kelib tushmasligini ta’kidladi. U mazkur yuz bergan hodisani to‘liq tekshirishga chaqirdi.
“Bularning hech biri Rossiyaning Ukrainaga qarshi urushisiz, Kiyev infratuzilmasini keng miqyosda o‘qqa tutayotgan raketalarsiz sodir bo‘lmasdi”, — deydi kansler.
Britaniya bosh vaziri Rishi Sunak ham xuddi shunday bayonot bilan chiqdi.
“Biz hammamiz aniq tushunishimiz kerak, agar Rossiyaning Ukrainaga bostirib kirishi bo‘lmaganida bularning hech biri sodir bo‘lmasdi. Putin urushining shafqatsiz haqiqati shunday. Bu davom etar ekan, bizning xavfsizligimiz va ittifoqchilarimiz xavfsizligiga tahdid soladi”, — dedi u.
O‘z navbatida, NATO bosh kotibi Yens Stoltenberg 16-noyabrdagi bayonotida Rossiya Polshaga qasddan raketa hujumi uyushtirgani va alyansga hujum qilishni rejalashtirayotganiga ishora qiluvchi belgi yo‘qligini aytdi. U Polshaga tushgan raketalar Ukrainaga tegishli bo‘lishi ehtimoli yuqoriligi, ammo bunda Kiyev aybdormasligini ta’kidladi.
“Agar Rossiyaning Ukrainaga qarshi urushi bo‘lmaganida, Polshaga raketa hujumi bo‘lmagan bo‘lardi”, — dedi Stoltenberg.
Shuningdek, u Polshadagi voqeadan so‘ng NATOning sharqiy qanotiga qo‘shimcha havo hujumidan mudofaa tizimlari joylashtirilishini qo‘shimcha qildi.
15-noyabr kuni Polshaning ZET radiosi Ukraina bilan chegaradosh Prjevodov qishlog‘iga ikkita raketa qulagani, ikki kishi halok bo‘lgani haqida xabar berdi. Voqea munosabati bilan Polsha bosh vaziri Mateush Moravetski xavfsizlik va mudofaa bo‘yicha hukumat qo‘mitasining shoshilinch yig‘ilishini o‘tkazdi. Rossiya Xavfsizlik kengashi raisi o‘rinbosari Dmitriy Medvedev Polshada qulagan raketa bilan bog‘liq voqea G‘arb jahon urushi ehtimolini oshirayotganini isbotlashini aytdi.
Izoh (0)