Afg‘oniston bilan chegaradagi “Spin-Boldak—Chaman” nazorat o‘tkazish punkti yaqinidagi otishmada Pokiston chegara qo‘shinidan bir askar halok bo‘lib, yana ikki nafari yaralangandi. “Tolibon” harakati bu hujumga aloqadorligini rad etdi. Bu haqda Hasht-e Subh Daily xabar berdi.
“Tolibon” matbuot kotibi Zabihulla Mujohid Twitter sahifasida hujum noma’lum qurollangan shaxs tomonidan amalga oshirilganini yozdi. Mujohid bu voqeadan afsusda ekanini bildirdi va hodisani tekshirish uchun yuqori darajali qo‘mita tuzilganini e‘lon qildi. Rasmiy shunga o‘xshash voqealar kelajakda sodir bo‘lmasligi uchun harakat qilinayotganini qo‘shimcha qildi.
12-noyabr kuni Pokiston Afg‘oniston xavfsizlik kuchlari nazorat-o‘tkazish punktida navbatchilik qilayotgan pokistonlik chegarachilarga qarata o‘t ochgan. Otishma chog‘ida Pokiston chegara korpusining bir askari halok bo‘lgan, ikki nafari yaralangan. Afg‘onistonlik qurbonlar haqida esa ma’lumot yo‘q.
Pokiston rasmiylari nazorat-o‘tkazish punkti ishini vaqtincha to‘xtatgan va Afg‘oniston hodisa uchun javobgarlarni ekstraditsiya qilmaguncha, uni qayta tiklashni rejalashtirmayapti.
O‘tgan yil davomida Pokiston bir necha bor Afg‘onistonni chegara hududlarini o‘qqa tutganlikda ayblagan. Bunga javoban Islomobod aprel oyida Afg‘onistonning Xost va Kunar viloyatlariga bir qator aviahujumlar uyushtirgan va oqibatda 50 ga yaqin odam halok bo‘lgan.
Izoh (0)