Xitoy raisi Si Szinpin 15-noyabr, seshanba kuni G20 sammitida bayonot berib, bir tomonlama sanksiyalarni bekor qilishga chaqirdi. Bu haqda Global Times xabar berdi.
Uning so‘zlariga ko‘ra, dunyo oziq-ovqat va energetika masalalarini siyosiylashtirishga qat‘iy qarshi turishi kerak. Chunki bu global rivojlanish sohasidagi eng dolzarb muammolar sanaladi. Si Szinpin hozirgi inqirozning asosiy sababi yetkazib berish zanjirlari bilan bog‘liq muammo va xalqaro hamkorlikning uzilishi ekanini aytdi. U bu vaziyatdan chiqish uchun barcha mamlakatlar Birlashgan Millatlar Tashkiloti (BMT) va boshqa ko‘p tomonlama xalqaro tashkilotlar bilan kelishgan holda bozorni nazorat qilishi hamda tartibga solish sohasida hamkorlikni kuchaytirishi kerakligini ta’kidladi.
Shuningdek, Xitoy rahbari ochiq va barqaror tovar bozorini rivojlantirish, yetkazib berish zanjiri va bozor narxlarini birgalikda barqarorlashtirish zarurligini aytdi. U bir tomonlama sanksiyalar va texnik hamkorlikdagi cheklovlarni bekor qilishga chaqirdi.
Ma’lumot uchun, 14 noyabr kuni Si Szinpin AQSH prezidenti Jo Bayden bilan uchrashdi. Xitoy va AQSH rahbarlari ikki davlat rahbarlari sifatida ilk bor yuzma-yuz muzokara o‘tkazdi.
Izoh (0)