Афғонистон билан чегарадаги «Спин-Болдак—Чаман» назорат ўтказиш пункти яқинидаги отишмада Покистон чегара қўшинидан бир аскар ҳалок бўлиб, яна икки нафари яраланганди. «Толибон» ҳаракати бу ҳужумга алоқадорлигини рад этди. Бу ҳақда Hasht-e Subh Daily хабар берди.
«Толибон» матбуот котиби Забиҳулла Мужоҳид Twitter саҳифасида ҳужум номаълум қуролланган шахс томонидан амалга оширилганини ёзди. Мужоҳид бу воқеадан афсусда эканини билдирди ва ҳодисани текшириш учун юқори даражали қўмита тузилганини эълон қилди. Расмий шунга ўхшаш воқеалар келажакда содир бўлмаслиги учун ҳаракат қилинаётганини қўшимча қилди.
12 ноябрь куни Покистон Афғонистон хавфсизлик кучлари назорат-ўтказиш пунктида навбатчилик қилаётган покистонлик чегарачиларга қарата ўт очган. Отишма чоғида Покистон чегара корпусининг бир аскари ҳалок бўлган, икки нафари яраланган. Афғонистонлик қурбонлар ҳақида эса маълумот йўқ.
Покистон расмийлари назорат-ўтказиш пункти ишини вақтинча тўхтатган ва Афғонистон ҳодиса учун жавобгарларни экстрадиция қилмагунча, уни қайта тиклашни режалаштирмаяпти.
Ўтган йил давомида Покистон бир неча бор Афғонистонни чегара ҳудудларини ўққа тутганликда айблаган. Бунга жавобан Исломобод апрель ойида Афғонистоннинг Хост ва Кунар вилоятларига бир қатор авиаҳужумлар уюштирган ва оқибатда 50 га яқин одам ҳалок бўлган.
Изоҳ (0)