AQSH Polshaga tushgan raketa hodisasida Rossiyani javobgar deb e’lon qildi

AQSH tergov natijalaridan qat’iy nazar, Polshaga tushgan raketalar uchun Rossiyani javobgar deb biladi. Oq uy tegishli bayonotni e’lon qildi.

Bayonotga ko‘ra, Oq uy Ukraina raketalari Polshaga qulaganini inkor etuvchi dalillar bilan tanishmagan, biroq hodisada Rossiya javobgar.

“AQSH hodisaning tasvirini to‘ldirish uchun Ukraina bilan yaqin aloqada. Yakuniy xulosalar qanday bo‘lishidan qat’iy nazar, mazkur fojiali voqea Rossiya Ukrainaning fuqarolik infratuzilmasini nishonga olishi sababli yuz berdi. Ukraina o‘zini himoya qilish huquqiga ega.

Biz yana bir bor Ukraina xalqi bilan birdamligimizni va havo hujumlarida ko‘rgan yo‘qotishlar uchun hamdardligimizni bildiramiz. Millionlab ukrainaliklar elektr, suv va zaruriy ehtiyojlarsiz qolmoqda. Polshaga kelib tushgan raketa oqibatida halok bo‘lganlarning yaqinlariga ta’ziya bildiramiz” deyiladi bayonotda.

Ma’lumot o‘rnida, 15-noyabr kuni Ukrainaning Kiyev shahri va bir qator viloyatlariga 80 dan ortiq raketa uchirildi. Holat yuzasidan prezident Zelenskiy aholiga boshpanalarda qolishni so‘radi. Shu kuni Polshaga ikkita raketa tushdi va hodisada ikki kishi o‘ldi. Polsha bosh vaziri tunda Vazirlar Kengashining Milliy xavfsizlik va mudofaa qo‘mitasini chaqirdi. Havoga qiruvchi samolyotlar ko‘tarildi. Polsha prezidenti raketalarning Ukrainaga tegishli bo‘lishi mumkinligini aytdi. NATO bosh kotibi ham shunday fikr bildirdi, ammo bunda Kiyev emas, Rossiya javobgarligini ta’kidladi. Zelenskiy esa raketalar Ukrainaga emas, balki Rossiyaga tegishli ekanini e’lon qildi hamda Polshadan tergovga qo‘shilishni talab qildi.