АҚШ Польшага тушган ракета ҳодисасида Россияни жавобгар деб эълон қилди

АҚШ тергов натижаларидан қатъий назар, Польшага тушган ракеталар учун Россияни жавобгар деб билади. Оқ уй тегишли баёнотни эълон қилди.

Баёнотга кўра, Оқ уй Украина ракеталари Польшага қулаганини инкор этувчи далиллар билан танишмаган, бироқ ҳодисада Россия жавобгар.

«АҚШ ҳодисанинг тасвирини тўлдириш учун Украина билан яқин алоқада. Якуний хулосалар қандай бўлишидан қатъий назар, мазкур фожиали воқеа Россия Украинанинг фуқаролик инфратузилмасини нишонга олиши сабабли юз берди. Украина ўзини ҳимоя қилиш ҳуқуқига эга.

Биз яна бир бор Украина халқи билан бирдамлигимизни ва ҳаво ҳужумларида кўрган йўқотишлар учун ҳамдардлигимизни билдирамиз. Миллионлаб украиналиклар электр, сув ва зарурий эҳтиёжларсиз қолмоқда. Польшага келиб тушган ракета оқибатида ҳалок бўлганларнинг яқинларига таъзия билдирамиз» дейилади баёнотда.

Маълумот ўрнида, 15 ноябрь куни Украинанинг Киев шаҳри ва бир қатор вилоятларига 80 дан ортиқ ракета учирилди. Ҳолат юзасидан президент Зеленский аҳолига бошпаналарда қолишни сўради. Шу куни Польшага иккита ракета тушди ва ҳодисада икки киши ўлди. Польша бош вазири тунда Вазирлар Кенгашининг Миллий хавфсизлик ва мудофаа қўмитасини чақирди. Ҳавога қирувчи самолётлар кўтарилди. Польша президенти ракеталарнинг Украинага тегишли бўлиши мумкинлигини айтди. НАТО бош котиби ҳам шундай фикр билдирди, аммо бунда Киев эмас, Россия жавобгарлигини таъкидлади. Зеленский эса ракеталар Украинага эмас, балки Россияга тегишли эканини эълон қилди ҳамда Польшадан терговга қўшилишни талаб қилди.