AQSHning 45-prezidenti Donald Trampning qizi, ishbilarmon ayol Ivanka otasining yangi prezidentlik saylovoldi kampaniyasida ishtirok etishni rejalashtirmayapti. Bu haqda u Fox News Digital axborot portaliga bergan intervyusida aytdi.
“Otamni juda yaxshi ko‘raman. Ammo bu safar men yosh bolalarim va shaxsiy, oilaviy hayotimni birinchi o‘ringa qo‘yishga qaror qildim. Otamni doim qo‘llab-quvvatlayman, lekin siyosiy maydondan tashqarida”, — dedi Trampning prezidentligi davrida unga maslahatchi bo‘lgan Ivanka.
2016-yilda Trampning birinchi saylovoldi kampaniyasi paytida Ivanka otasini qo‘llab-quvvatlovchi tadbirlar va mitinglarda tez-tez nutq so‘zlagan, saylovda g‘alaba qozonganidan keyin esa AQSH ma’muriyatida ko‘ngilli maslahatchi bo‘lib ishlagan. Ivankaning turmush o‘rtog‘i Jared Kushner prezident ma’muriyatida katta maslahatchi bo‘lgan.
Trampning kuyovi va qizining davlat boshqaruvidagi faoliyati ommaviy axborot vositalarida tanqidlarga sabab bo‘ldi. Xususan, Ivanka xavfsizlik bo‘yicha qarorlar muhokamasida ishtirok etgani va Suriyaga zarba berish to‘g‘risida qaror qabul qilishda prezidentga ta’sir o‘tkazgani haqida xabarlar bor. 2018-yilda New York Times gazetasi Kushnerni bir necha yil davomida daromad solig‘i to‘lamaganlikda ayblagan.
Trampning o‘zi 2024-yilgi prezident sayloviga o‘z nomzodini qo‘ygani haqida e’lon qildi. Shuningdek, u agar AQSH prezidenti bo‘lsa, saylov tizimini isloh qilishga va’da berdi.
Izoh (0)