Nima uchun ukol olingan joyda og‘riq paydo bo‘ladi va og‘riqni qanday yengillashtirish mumkin?

Ukol olishni ko‘pchilik yoqtirmaydi. Ayniqsa, undan keyin paydo bo‘ladigan og‘riq yanada yoqimsiz. Ukol qilingan joyning og‘rishiga nima sabab bo‘lishi mumkin? Uni yengillashtirishning usullari mavjudmi? Wday nashri quyida ushbu savolga javob berdi.

Mushak ichiga ukol qilishdan keyin og‘riq quyidagi sabablarga ko‘ra paydo bo‘lishi mumkin:

• noto‘g‘ri texnika tufayli yallig‘lanish;
• dori-darmonlarga allergik reaksiya;
• preparatning uzoq vaqt davomida so‘rilishi, bu esa og‘riqli shish paydo bo‘lishiga olib keladi.

Agar og‘riq doriga bo‘lgan allergiyadan kelib chiqsa, ukol qilingan joy nafaqat og‘riydi, balki qichishadi. Agar og‘riq kuchli bo‘lsa, bu yallig‘lanishning belgisidir. Dori-darmon tufayli paydo bo‘lgan shish barmoqlar bilan yengil bosilganda, osongina seziladi.

Agar ukol qilingan joyda nafaqat og‘riq, balki harorat ko‘tarilsa yoki shish, yiringlash yoki katta qizarish kuzatilsa, darhol shifokorga murojaat qilish kerak. Bu yiringli yallig‘lanish jarayoni bo‘lishi mumkin, uni o‘zboshimchalik bilan davolash xavflidir.

Ukoldan keyingi og‘riqning oldini olish mumkinmi?

Sifatli shprits va preparatni sekin yuborish ukoldan keyin og‘riqli shish paydo bo‘lishining oldini olishga yordam beradi.

Preparat mushak ichiga chuqur kirib borishi uchun ignasi yetarlicha uzun shpritsdan foydalanish kerak, ya’ni hajmi kamida 5 millilitr bo‘lishi kerak.

Yog‘ga asoslangan dorini ukol qilishda ampulani kaftlar yoki iliq suvda isitish kerak. Uni sovuq shaklda kiritish tufayli og‘riq paydo bo‘lishi yoki hatto yallig‘lanish kuzatilishi mumkin.

Ukolni tajribali mutaxassisdan olish yaxshiroq. Preparatni yaxshiroq so‘rilishi uchun uni bo‘shashgan mushak ichiga yuborish kerak. Buning uchun eng yaxshi pozitsiya qorin bilan yotishdir.

Agar mushak ichiga ukol olish kursini o‘tkazish kerak bo‘lsa, ukol qilish joyini har kuni o‘zgartirish kerak, ya’ni chap va o‘ng tomonlarda navbat bilan. Agar ko‘proq yurilsa, dori tezroq eriydi.

Ukoldan keyin og‘riqni xalqona usullar bilan davolash mumkinmi?

Agar yiringli yara va isitma bo‘lmasa, lekin ukol qilingan joyda og‘riq qiynasa, og‘riq qoldiruvchi vositalarni qabul qilish va tasdiqlangan usullardan birini qo‘llash mumkin:

• karam bargi yuviladi va og‘riqli joyga qo‘llanadi. Bir kun yoki kamida bir kechaga qoldiriladi;
• asalga allergiya bo‘lmasa, un bilan asaldan xamir tayyorlab, uni kompress sifatida qo‘llash mumkin. Folga bilan yopib, bir kechaga qoldiriladi, ertalab yuvib tashlanadi;
• maydalangan turp va asaldan kompres qilinadi, uch soat davomida qo‘yiladi;
• kefir yoki shakarsiz yogurtda paxta namlanadi va bir soatga qo‘yiladi.

Ukol qilingan joyning nima uchun og‘riyotganini aniqlab, xalqona va tibbiy vositalar yordamida vaziyatni yengillashtirish mumkin. Biroq ba’zi narsalar qat’iyan tavsiya etilmaydi. Masalan, og‘riqli joyni hammom yoki saunada isitish — bu yallig‘lanish jarayonining kuchayishiga olib kelishi mumkin. Shuningdek, massaj qilish ham mumkin emas. Agar uning ostida yiringli yara bo‘lsa, u yorilib ketadi, natijada qonda zaharlanish ehtimoli ortadi.

Spirtli kompresslar faqat og‘riqlar preparatning sekin so‘rilishidan kelib chiqqanligiga ishonch hosil qilgan taqdirda ishlatilishi mumkin. Agar yallig‘lanish jarayoni bo‘lsa, u faqat kuchayadi. Ehtiyot choralarini ko‘rish va og‘riqni to‘g‘ri bartaraf etish orqali 2-3 kundan keyin uning yo‘qolishiga erishish mumkin.