Нима учун укол олинган жойда оғриқ пайдо бўлади ва оғриқни қандай енгиллаштириш мумкин?

Укол олишни кўпчилик ёқтирмайди. Айниқса, ундан кейин пайдо бўладиган оғриқ янада ёқимсиз. Укол қилинган жойнинг оғришига нима сабаб бўлиши мумкин? Уни енгиллаштиришнинг усуллари мавжудми? Wday нашри қуйида ушбу саволга жавоб берди.

Мушак ичига укол қилишдан кейин оғриқ қуйидаги сабабларга кўра пайдо бўлиши мумкин:

• нотўғри техника туфайли яллиғланиш;
• дори-дармонларга аллергик реакция;
• препаратнинг узоқ вақт давомида сўрилиши, бу эса оғриқли шиш пайдо бўлишига олиб келади.

Агар оғриқ дорига бўлган аллергиядан келиб чиқса, укол қилинган жой нафақат оғрийди, балки қичишади. Агар оғриқ кучли бўлса, бу яллиғланишнинг белгисидир. Дори-дармон туфайли пайдо бўлган шиш бармоқлар билан енгил босилганда, осонгина сезилади.

Агар укол қилинган жойда нафақат оғриқ, балки ҳарорат кўтарилса ёки шиш, йиринглаш ёки катта қизариш кузатилса, дарҳол шифокорга мурожаат қилиш керак. Бу йирингли яллиғланиш жараёни бўлиши мумкин, уни ўзбошимчалик билан даволаш хавфлидир.

Уколдан кейинги оғриқнинг олдини олиш мумкинми?

Сифатли шприц ва препаратни секин юбориш уколдан кейин оғриқли шиш пайдо бўлишининг олдини олишга ёрдам беради.

Препарат мушак ичига чуқур кириб бориши учун игнаси етарлича узун шприцдан фойдаланиш керак, яъни ҳажми камида 5 миллилитр бўлиши керак.

Ёғга асосланган дорини укол қилишда ампулани кафтлар ёки илиқ сувда иситиш керак. Уни совуқ шаклда киритиш туфайли оғриқ пайдо бўлиши ёки ҳатто яллиғланиш кузатилиши мумкин.

Уколни тажрибали мутахассисдан олиш яхшироқ. Препаратни яхшироқ сўрилиши учун уни бўшашган мушак ичига юбориш керак. Бунинг учун энг яхши позиция қорин билан ётишдир.

Агар мушак ичига укол олиш курсини ўтказиш керак бўлса, укол қилиш жойини ҳар куни ўзгартириш керак, яъни чап ва ўнг томонларда навбат билан. Агар кўпроқ юрилса, дори тезроқ эрийди.

Уколдан кейин оғриқни халқона усуллар билан даволаш мумкинми?

Агар йирингли яра ва иситма бўлмаса, лекин укол қилинган жойда оғриқ қийнаса, оғриқ қолдирувчи воситаларни қабул қилиш ва тасдиқланган усуллардан бирини қўллаш мумкин:

• карам барги ювилади ва оғриқли жойга қўлланади. Бир кун ёки камида бир кечага қолдирилади;
• асалга аллергия бўлмаса, ун билан асалдан хамир тайёрлаб, уни компресс сифатида қўллаш мумкин. Фольга билан ёпиб, бир кечага қолдирилади, эрталаб ювиб ташланади;
• майдаланган турп ва асалдан компрес қилинади, уч соат давомида қўйилади;
• кефир ёки шакарсиз йогуртда пахта намланади ва бир соатга қўйилади.

Укол қилинган жойнинг нима учун оғриётганини аниқлаб, халқона ва тиббий воситалар ёрдамида вазиятни енгиллаштириш мумкин. Бироқ баъзи нарсалар қатъиян тавсия этилмайди. Масалан, оғриқли жойни ҳаммом ёки саунада иситиш — бу яллиғланиш жараёнининг кучайишига олиб келиши мумкин. Шунингдек, массаж қилиш ҳам мумкин эмас. Агар унинг остида йирингли яра бўлса, у ёрилиб кетади, натижада қонда заҳарланиш эҳтимоли ортади.

Спиртли компресслар фақат оғриқлар препаратнинг секин сўрилишидан келиб чиққанлигига ишонч ҳосил қилган тақдирда ишлатилиши мумкин. Агар яллиғланиш жараёни бўлса, у фақат кучаяди. Эҳтиёт чораларини кўриш ва оғриқни тўғри бартараф этиш орқали 2-3 кундан кейин унинг йўқолишига эришиш мумкин.