Ukrainada Rossiya tomonidan jang qilgan tankchi 12 yilga qamaldi. U Mariupoldagi uylarni o'qqa tutgan

Ukraina sudi Rossiya tomonida jang qilgan tankchini 12 yilga ozodlikdan mahrum qildi, deb xabar berdi Meduza Ukraina Xavfsizlik xizmatiga tayanib.

Kimligi oshkor etilmagan (faqat uning chaqiruv belgisi “Fil” ekani ma’lum) erkak urush paytida T-72 tankining operatori sifatida Mariupoldagi ko‘p qavatli uylarga kamida 20 marta o‘q uzganlikda ayblangan.

U aprel oyi oxirida Donetsk viloyatining Ravnopol qishlog‘i yaqinida Ukraina qurolli kuchlaridan qabul qilingan zarba natijasida yaralanib, asirga olingan.

Ukraina Xavfsiz xizmatining ta’kidlashicha, tankchiga qarshi “inkor etib bo‘lmas dalillar” to‘plangan. Sud uni davlatga xiyonat qilish va noqonuniy qurolli tadbirda ishtirok etish moddalari bo‘yicha aybdor deb topdi.

Ukraina Xavfsizlik xizmati sudlanuvchi 2014-yildan beri o‘zini o‘zi e’lon qilgan DXR qo‘shinlari safida bo‘lganini va Rossiyaning Ukrainaga bosqini boshida Rossiya Qurolli Kuchlarining 8-gvardiya birlashgan qurolli armiyasiga qo‘shilganini bildirdi.