Xerson ozod bo‘ldi. Ukrainaning navbatdagi qadami qanday bo‘ladi? (video)

9-noyabr kuni Rossiya qo‘shinlari Xerson viloyatidan chekinganidan so‘ng Ukraina mazkur hududni o‘z nazoratiga oldi.

Xerson aholisi ukrainalik askarlarni katta xursandchilik bilan kutib olganini alohida ta’kidlash kerak. Askarlar huzuriga minglab xersonliklar Ukraina bayroqlarini ko‘tarib chiqdi.

Holbuki, joriy yilning sentabr oyida Xerson viloyatini Rossiya tarkibiga qo‘shilishi bo‘yicha o‘tkazilgan referendumda 80 foizdan ko‘proq aholi bu qarorni quvvatlab ovoz bergani Rossiya OAV tomonidan ma’lum qilingandi. Xersondan chekinishdan avval Rossiya qo‘shinlari shaharda bir qancha infratuzilma obyektlarini portlatib yuborgani aniqlandi.

Shunday bo‘lsa-da, Xersonni qaytarib olinishi Ukraina prezidenti Vladimir Zelenskiy tomonidan katta g‘alaba sifatida qayd etildi.

“Bugun tarixiy kun — biz yurtimizning janubiga qaytmoqdamiz. Biz Xersonga qaytdik.

Xerson aholisi buni kutayotgan edi. Ular hech qachon Ukrainani tark etmagan. Ukrainaga bo‘lgan umid har doim o‘zini oqlaydi va Ukraina har doim o‘zinikini qaytarib oladi”, – dedi Zelenskiy videomurojaatda.

Xerson viloyatidan Rossiya qo‘shinlari olib chiqib ketilgandan so‘ng, u yerda 400 dan ortiq harbiy jinoyatlar hujjatlashtirildi. Ozod qilingan hududlarda Ukraina huquq-tartibot idoralari tomonidan tinch aholi va harbiylarning jasadlari topildi.

Yo‘qotishlar katta bo‘lgani bilan Xersonning egallanishi Ukraina armiyasiga katta ruhiy kuch bermoqda. 14-noyabr kuni Ukraina prezidenti Vladimir Zelenskiy Xersonga tashrif buyurdi

Xersondagi nutqi chog‘ida Zelenskiy Ukraina tinchlik muzokaralariga tayyorligini yana bir bor ma’lum qilgan. “Biz olg‘a intilyapmiz va tinchlikka, butun mamlakatimiz osoyishtaligiga erishish uchun qadam tashlashga tayyormiz”, — dedi Zelenskiy.

Ammo hozircha Rossiya va Ukraina o‘rtasida muzokaralar o‘tkazish masalasida oldinga siljish kuzatilmayapti.