Rossiya prezidenti Vladimir Putinning yillik katta matbuot anjumani 2022-yilda bo‘lib o‘tmasligi mumkin, hozircha uni yil oxirigacha o‘tkazish to‘g‘risida yakuniy qarorga kelinmagan, deb yozadi Meduza.
Vladimir Putin 2001-yildan katta matbuot anjumanlari o‘tkazishni yo‘lga qo‘ygan, 2012-yilda ularni o‘tkazish uchun dekabr oyi tanlangan. Agar tadbir shu yilning dekabr oyida bo‘lib o‘tmasa, Putin 2005-yildan keyin ikkinchi marta bu yil matbuot anjumani o‘tkazmaydi. Shuningdek, Putin bosh vazir bo‘lgan 2009—2011-yillarda ham matbuot anjumanlari bo‘lmagan.
Manbaning ta’kidlashicha, bu yil prezident va rossiyaliklar o‘rtasida “yuzma-yuz anjuman” o‘tkazish to‘g‘risida ham yakuniy qaror yo‘q. Nashr manbalarining aytishicha, hozircha tadbirga tayyorgarlik ko‘rilmayapti. Suhbatdoshlardan biri yakuniy qaror qabul qilishda “boshqa narsalar qatori maxsus harbiy operatsiya zonasidagi vaziyat ham hisobga olinishini” ta’kidladi.
“Yuzma-yuz anjuman” sanalari tez-tez o‘zgarib turdi, oxirgi marta u 2021-yil 30-iyunda o‘tkazilgan. Urush boshlanganidan keyin Rossiya prezidentining matbuot kotibi Dmitriy Peskov bir necha bor “yuzma-yuz anjuman” rejalashtirilganini aytgan edi, ammo aniq sanalar noma’lumligicha qolgan. Avgust oyida u 2020-yildagi pandemiya paytida bo‘lgani kabi, buni katta matbuot anjumani bilan birlashtirish mumkinini aytdi.
“RBK”ning ta’kidlashicha, prezidentning Federal Majlisga murojaati qachon bo‘lib o‘tishi aniq emas, bunga tayyorgarlik, Peskov avvalroq aytganidek, allaqachon boshlangan.
Dmitriy Peskov 14-noyabr kuni jurnalistlar bilan suhbatda katta matbuot anjumani sanasi prezidentning Federal majlisga qachon murojaat yetkazishiga bog‘liq bo‘lishini aytdi, deb yozadi “Interfaks”.
“Prezident bir qator tadbirlarni o‘tkazishning aniq sanalari haqida qaror qilgani yo‘q. Tabiiyki, ularni ketma-ket amalga oshirish mantiqqa to‘g‘ri kelmaydi”, — deydi Peskov.
Izoh (0)