Yaqinda ijtimoiy tarmoqlarda Kentukki universiteti basketbol jamoasining o‘yini vaqtida olingan suratlar tarqaldi. Suratda o‘g‘li bilan o‘yinga borgan ota tasvirlangan, uning kiyimlari iflos, qo‘llari va yuzi ko‘mir changi bilan qoplangan. AdMe nashri ushbu fotosuratning o‘ziga xosligi va nima sababdan u o‘n minglab layk yig‘gani haqida ma’lumot berdi.
Surat bir muxlis tomonidan e’lon qilingan va agar bu kadr Kentucky Wildcats bosh murabbiyi Jon Kalipari tomonidan qayta joylanmaganida e’tibordan chetda qolishi mumkin edi. Jon fotosurat tavsifida holat haqida qisqacha izoh berib o‘tgan.
Ma’lum bo‘lishicha, konchi ish smenasidan so‘ng darhol basketbol o‘yiniga otlangan. U o‘g‘li bilan o‘yinni tomosha qilishni xohlardi. Biroq konchi dush qabul qilishga va kiyinishga ulgurmadi. Shuning uchun u kiyimlari kir holatda o‘yinga bordi. Murabbiy muxlisning bu harakatiga qoyil qoldi va unga, uning oilasiga keyingi o‘yinga VIP chiptalarni va’da qildi.
Surat shu qadar mashhur bo‘ldiki, konchining rafiqasi bunga munosabat bildirgan. U hatto Twitter’da eski akkauntiga kirish huquqini yo‘qotib, yangi akkaunt yaratdi. Molli ismli ayol uning turmush o‘rtog‘i Maykl Makguayr va 3 yoshli o‘g‘li Istonning surati ijtimoiy tarmoqlarda tarqalib ketgan. Gap shundaki, erkak o‘g‘liga hayotidagi ilk basketbol o‘yiniga u bilan birga borishga va’da bergan. Biroq konchining navbatchiligi kech tugaganligi sababli Mollining o‘zi farzandini arenaga olib kelgan va u yerda turmush o‘rtog‘i bilan uchrashgan. “U uchun o‘yin boshidanoq Iston bilan birga bo‘lish juda muhim edi”, — deydi ayol.
O‘zining tashqi ko‘rinishi bilan ajralib turgan bu insonni Kentukkidan kelgan jamoaning sodiq muxlisi Syu Kinner payqab qoldi va suratga oldi. “Uning hamma joyi iflos, yuzi qoraygan edi. U juda charchagandek ko‘rinardi, biroq o‘g‘liga jilmayib qo‘yardi. Kichkina bola uni quchoqlab, otasining tizzasiga o‘tirdi. Ular juda baxtli ko‘rinishardi”, — deydi Syu jurnalistlarga.
Tarmoq foydalanuvchilariga mashaqqatli mehnatdan charchaganiga qaramay, basketbol o‘yinida o‘g‘li bilan vaqt o‘tkazish uchun vaqt va kuch topib olgan ota haqidagi hikoya juda yoqdi. “U haqiqatan ham dunyodagi eng yaxshi ota”, — deydi konchining rafiqasi Molli.
Izoh (0)