Farg‘ona viloyati IIB 15 yoshli o‘smirning o‘limi ortidan tayinlangan xizmat tekshiruvi yakunlanganini ma’lum qildi.
Avvalroq Qo‘qon shahar voyaga yetmaganlarga ijtimoiy-huquqiy yordam ko‘rsatish markazi yotoqxonasida voyaga yetmagan R.A. tan jarohati yetkazishi oqibatida vafot etgani bo‘yicha ikki nafar xodim IIO xizmatidan bo‘shatilgandi. Ular navbatchilik qilgan kunda tarbiyalanuvchilarni nazoratsiz qoldirib, janjalning oldini olmagan.
Viloyat IIB xabariga ko‘ra, IIV tegishli xizmatlari tomonidan o‘tkazilgan xizmat tekshiruvi yakuniga ko‘ra, ushbu markaz boshlig‘i egallab turgan lavozimidan ozod etilgan.
Shuningdek, xizmat faoliyatida yo‘l qo‘ygan kamchiliklari uchun uch nafar xodimga hayfsan intizomiy jazosi tayinlangan. To‘rt nafar xodimning esa lavozimiga loyiq yoki noloyiqligini aniqlash maqsadida navbatdan tashqari attestatsiyadan o‘tkazilishi belgilandi.
Marhumning o‘limi tafsilotlari
15-yoshli bola o‘limi yuzasidan avvaliga 8 nafar voyaga yetmagan bola gumonlanayotgandi. Holat yuzasidan Qo‘qon shahar prokuraturasi tomonidan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘lishiga sabab bo‘lsa) bilan jinoyat ishi qo‘zg‘atilgan. Tergov mobaynida ikki nafar voyaga yetmagan tarbiyalanuvchi marhum R.A.ni urib, uning o‘limiga sabab bo‘lgan tan jarohatlari yetkazgani aniqlandi va ular qamoqqa olindi.Bolalar ombudsmani bo‘lib o‘tgan voqea nazoratga olinganini va bolaning vafotida aybdor bo‘lgan shaxslarga nisbatan sud tomonidan qonuniy jazo berilishini ma’lum qildi.
Izoh (0)