Rossiyadagi Pskov davlat universitetida tahsil olayotgan o‘zbekistonlik talabalarning o‘qishni vatanga ko‘chirishni so‘rab prezidentga yo‘llagan murojaati ijtimoiy tarmoqlarda tarqaldi.
Ular ayni vaqtda Rossiyada urush sabab yuzaga kelgan notinch vaziyat Pskov shahriga ham o‘z ta’sirini o‘tkazayotgani, shaharda ogohlantiruvchi havo sirenalari chalinayotganini bildirgan.
“Kundan kunga jiddiylashib borayotgan holatlar bizni va ota-onalarimizni xavotirga solmoqda. Sizga murojaat qilar ekanmiz, xavfsizligimizni ta’minlab, yuqori saviyada bilim olishimizga yordam bersangiz”, — deyiladi talabalar murojaatida.
Oktabr oyining boshlarida Rossiyaning Kursk viloyatida o‘qiyotgan o‘zbekistonlik talabalar o‘qishni O‘zbekistondagi OTMlarga ko‘chirishda yordam berishni so‘rab prezidentga murojaat yo‘llagandi.
Davlat komissiyasining 7-son bayoni bilan Rossiyaning Ukraina bilan chegaradosh Kursk, Bryansk, Belgorod, Voronej, Rostov va Krasnodar hududlaridagi OTMlarida tahsil olayotgan O‘zbekiston fuqarolarining o‘qishini O‘zbekistondagi davlat OTMlariga istisno tariqasida ko‘chirishga ruxsat berilgandi.
Shundan so‘ng Qrimdagi o‘zbekistonlik talabalar ham bu borada prezidentdan yordam so‘rab chiqdi. Prezident topshirig‘iga asosan Qrim va Sevastopol hududlaridagi OTMda tahsil olayotgan O‘zbekiston fuqarolarining ham o‘qishini O‘zbekistondagi davlat OTMga istisno tariqasida ko‘chirishga ruxsat berildi.
Izoh (0)