O‘zbekiston musulmonlari idorasi raisi, Muftiy Nuriddin Xoliqnazarov Umra ziyoratini amalga oshirib qaytgan kishilarni dabdabali marosim o‘rniga kambag‘al oiladan xabar olish, ularga yordam berishni yo‘lga qo‘yishga chaqirdi.
“Muhtaram Umraning niyatida yurgan hoji ona, hoji onalarimiz. Ayni paytda Ka’batulloh atrofida tavof qilayotgan azizlarimiz. Yoki hozirgi kunda borishni jazm qilib turgan azizlarimiz. Keling, har birimiz niyat qilaylik. Agar Alloh taollo meni Ka’batulloh tavofiga musharraf qilsa, yoki Payg‘ambarimiz Muhammad S.A.V. ravzalariga borib namoz o‘qishni, ul zotning qabrlariga qarab salovat-u salomlar aytish baxtini bersa, ushbu ibodatdan qaytib kelganimdan keyin hech qanday riyo qilmaslikka, isrof qilmaslikka, balki hech bo‘lmaganda ikki kambag‘al oilaga qo‘ldan kelgancha yaxshilik qilishga Alloh nasib qilsin, deb va’da qiling.
Agar yilda yilda 70 ming nafar odam Umraga borayapti desak, hozirga qadar 40 mingga yaqini bordi. Agar har bir 40 ming kishi ikkitadan kambag‘al oilaning boshini silasa, 80 mingta oilaning xonadoniga baxt kirib boradi.
Siz o‘zi Umradan kelgandagi tadbir-u marosim, isrofgarchilik, riyo, xo‘jako‘rsin marosimga ketadigan xarajatni ikkita kambag‘al oila bolasining maktabi uchun, ta’limi uchun bersangiz edi. Yoki bolasini davolatish uchun, ota-onasini davolatish uchun dori izlayotgan odamga bersangiz edi. Bugun topgani oshga, nonga yetib, zo‘rg‘a yashayotgan azizlarning xonadoniga o‘sha xursandchilikni kirgazganingizda edi, uning savobi bu dabdababozlikdan chandon chandon ko‘p bo‘lar edi.
Shuning uchun azizlar, keling shu niyatimizni amalga oshiraylik. Har bir umrachi qaytib kelgandan keyin hech bo‘lmaganida ikkita, qodir bo‘lganicha, balki o‘ntalab kambag‘al va faqir oiladan xabar olish shiorini olg‘a suraylik. Va bu niyatimizga Alloh muvofiq aylagan bo‘lsin”, — dedi Muftiy Nuriddin Xoliqnazarov.
Mavzuga doir:
Izoh (0)