Prezidenti huzuridagi Davlat xizmatini rivojlantirish agentligi Davlat fuqarolik xizmatida rotatsiya qilish tartibi to‘g‘risidagi nizom loyihasini jamoatchilik muhokamasi uchun e’lon qildi.
Unga ko‘ra, 2023-yil 1-yanvardan boshlab davlat fuqarolik xizmatchilari majburiy, rejali va rejadan tashqari tartibda rotatsiya qilinadi, ya’ni egallab turgan lavozimdan teng bo‘lgan boshqa davlat fuqarolik xizmati lavozimiga o‘tkaziladi.
Davlat fuqarolik xizmatchisini rotatsiya qilish ularning salohiyati va tajribasidan oqilona foydalanish, manfaatlar to‘qnashuvi, korrupsiyaga oid huquqbuzarliklarning oldini olish maqsadida amalga oshiriladi.
Majburiy ravishda rotatsiya tartibidagi tayinlovlar lavozimni egallagan kundan boshlab har besh yilda amalga oshiriladi. Bunda qonunchilikka muvofiq boshqa muddatlar belgilanishi mumkin.
Quyidagi davlat fuqarolik xizmatchilari rotatsiya qilinmaydi:
- tayyorlash, qayta tayyorlashdan va malaka oshirishdan o‘tayotgan;
- homilador ayollar, uch yoshga to‘lmagan bolalari bor ayollar;
- tibbiy xulosaga asosan o‘zlari yoki ular bilan birga yashovchi oila a’zolari sog‘lig‘i holati rotatsiya o‘tkazilayotgan davlat fuqarolik xizmati lavozimi bo‘yicha xizmat majburiyatlarini amalga oshirish imkoniyatini bermaydiganlar;
- pensiya yoshiga yetishiga uch yil qolganlar.
Rotatsiya davlat fuqarolik xizmatchisi o‘tadigan lavozimga qo‘yiladigan malaka talablariga javob berishi sharti bilan amalga oshiriladi. Rotatsiya asosida boshqa lavozimga tayinlangan davlat fuqarolik xizmatchilarining samarali faoliyati uchun zarur bo‘lgan qo‘shimcha kasbiy bilimlar, ko‘nikmalar va malakalarni egallash maqsadida davlat organi tomonidan qayta tayyorlash kurslari tashkil etiladi.
Rotatsiya qilinayotgan davlat fuqarolik xizmatchisini va uning oila (turmush o‘rtog‘i va farzandlari) a’zolarini yangi xizmat joyiga ko‘chib o‘tish xarajatlari qoplanadi. Yangi xizmat o‘tash joyida yashash uchun turar joy yoki xizmat uyi bilan ta’minlanadi yoki turar joy yoki xizmat uyi bilan ta’minlashning imkoniyati yaratilganga qadar oila a’zolari sonidan kelib chiqqan holda ijaraga olingan uy uchun ijara puli to‘lab beriladi.
Ushbu hujjat loyihasi muhokamasi 25-noyabrgacha davom etadi.
Mavzuga doir:
Izoh (0)