АҚШ президенти Жо Байден COP27 иқлим ўзгариши бўйича конференцияда ўзидан олдинги президент Дональд Трамп даврида қабул қилинган иқлим бўйича Париж келишувидан чиқиш қарори учун узр сўради, деб ёзади «РБК».
«Париж келишувидан чиққанимиз учун узр сўрайман», — деди Байден конференцияда.
Қўшма Штатлар президенти иқлим инқирози «инсон хавфсизлиги ва сайёрамиз ҳаёти» учун муҳим эканлигини таъкидлади. У делегатларни АҚШ бу масалага жиддий ёндашаётганига ишонтирди.
«Яхши иқлим сиёсати бу — яхши иқтисодий сиёсат», — деб таъкидлади Америка президенти.
Париж иқлим келишуви 2015 йилда 195 давлат томонидан қабул қилинган. У глобал исишни чеклашга қаратилган. Ҳужжатда назарда тутилган чора-тадбирлардан бири углерод чиқиндиларини камайтириш ва технологик қайта жиҳозлашдир. Шартнома иштирокчилари иқлим муаммоларини ҳал қилиш учун ҳар йили ривожланаётган мамлакатларга 100 миллиард доллар ажратишга келишиб олган.
2017 йилда собиқ президент Дональд Трамп АҚШ ушбу келишувдан чиқишини эълон қилганди. Унинг сўзларига кўра, ҳозирги шароитда бу мамлакат учун фойдали эмас, чунки келишувнинг барча шартлари бажарилса, 2025 йилга бориб Қўшма Штатлар 2,7 миллион иш ўрнини йўқотиши мумкин. 2019 йилда Қўшма Штатлар БМТни келишувдан чиққани ҳақида расман хабардор қилган, бироқ у билдиришнома юборилганидан роппа-роса бир йил ўтиб кучга кириши керак эди.
2021 йилнинг 20 январида, инаугурациядан бир неча соат ўтгач, Жо Байден АҚШ президенти сифатида Трамп фармонларини бекор қилувчи қатор ҳужжатларни имзолади. Орадан бир ой ўтиб, февраль ойида Қўшма Штатлар яна Париж келишувига қўшилди.
Изоҳ (0)