Ekologik faollar Kolizeydagi transport harakatini to‘sib qo‘ydi
Iqlim faollari Kolizey yo‘lini egallab, Rim markazidagi transport harakatini to‘sib qo‘yishga harakat qildi, deb xabar beradi Corriere della Sera gazetasi.
Yangi neft va gaz konlarini o‘zlashtirishga qarshi chiqqan bir guruh yoshlar yana bir bor avtomobil egalarining g‘azabini qo‘zg‘atdi. Ekologik shior yozilgan bannerni ko‘targan besh kishi oddiy fuqarolarning haqorat va tahdidlariga qaramay, qatnov qismini tark etishdan bosh tortdi. Voqea joyiga ikki politsiya patruli yetib kelib, ularning xodimlari avvaliga faollarni yo‘lni tark etishga ko‘ndirishga urinib ko‘rdi va rad javobidan so‘ng esa ekofaollarni yo‘l chetiga sudrab olib chiqdi. Ularning beshalasi ham politsiya bo‘limiga olib ketilgan.
Bu kabi aksiyalar Rimda deyarli har kuni bo‘lib o‘tmoqda, biroq avvalroq faollar shahar markazidan tashqaridagi yirik magistrallarni, shuningdek, halqa yo‘lini to‘sib qo‘ygan edi. Bunday qoidabuzarliklar uchun Italiya qonunchiligi to‘rt ming yevrogacha jarima va shaharga kirishni taqiqlashni o‘z ichiga oladi. Bu turdagi hodisalar uchun mas’ul tashkilot avvalroq uning ishtirokchilari uchun jarima miqdori 50 ming yevrogacha yetib borgani, biroq qoidabuzarlar jarimalarni to‘lamoqchi emasligini ma’lum qilgandi.
Mavzuga doir:
- “Sayyora ‘iqlim do‘zaxi’ tomon ketmoqda” — BMT bosh kotibi
- Niderlandiyalik ekofaollar Yan Vermeerning “Marvarid sirg‘ali qiz” kartinasiga zarar yetkazishga harakat qildi
