Tramp Kongress saylovi natijalari uning 2024-yilgi rejalariga ta’sir qilmasligini aytdi
AQSHning 45-prezidenti Donald Tramp mamlakatda o‘tkazilgan Kongress saylovlarining Respublikachilar partiyasi uchun muvaffaqiyatli bo‘lganini olqishladi va saylov tadbirlarining dastlabki natijalari uning 2024-yilgi siyosiy istiqbollarga oid rejalarini e’lon qilishga ta’sir qilmaganini ta’kidladi. Tramp, shuningdek, g‘alaba qozongan respublikachilarni “o‘z odamlari” deb atadi.
“Men go‘yoki g‘azablanganim haqida yolg‘on xabarlar tarqaldi, aslida buning aksi. Men qo‘llab-quvvatlagan odamlar juda yaxshi natijalarga erishdi”, — dedi Donald Tramp Fox News Digital bilan muloqotda. U respublikachi nomzodlar bilan faxrlanishini ta’kidlab, kelajakda ularni qo‘llab-quvvatlashga va’da berdi.
8-noyabr kuni Amerika aholisi Kongress Vakillar palatasini to‘liq tarkibda, Senatning uchdan bir qismini, 50 ta shtat gubernatoridan 36 nafarini qayta sayladi. Ushbu saylov natijalari Jo Bayden prezidentligining keyingi ikki yiliga va AQSH siyosatiga, jumladan, Rossiya bilan urushda Ukrainani qo‘llab-quvvatlashiga ta’sir qiladi. Ayni paytda ovozlarni sanash davom etmoqda.
Dastlabki ma’lumotlarga ko‘ra, Tramp qo‘llab-quvvatlagan respublikachilarning 216 nafari Demokratik partiyadan bo‘lgan raqiblari ustidan g‘alaba qozongan (19 nafari yutqazgan). Avvalroq Donald Tramp 15-noyabr kuni “juda muhim xabar” e’lon qilishini aytgan va 2024-yilda Oq uyni qaytarib olishga va’da bergandi.
