Rossiya prezidenti Vladimir Putin Balidagi G20 sammitiga bormaydi, ammo uchrashuvlardan birida onlayn-formatda nutq so‘zlaydi. Bu haqda Indoneziya dengiz va investitsiya masalalari bo‘yicha muvofiqlashtiruvchi vazir matbuot kotibi Jodi Maxardi Reuters’ga ma’lum qildi.
Uning so‘zlariga ko‘ra, Rossiya rahbariga tashqi ishlar vaziri Sergey Lavrov vakillik qiladi. Bu haqda avvalroq Bloomberg manbalari ham aytgandi.
Rossiyaning sammitdagi ishtiroki qanday formatda bo‘lishi haqida rasman e’lon qilinganicha yo‘q. Kreml 9-noyabr kuni Putinning ishtiroki bo‘yicha turli formatlar muhokama qilinayotganini ma’lum qildi. Prezident matbuot kotibi Dmitriy Peskov qaror haqida shu hafta e’lon qilinadi, deb va’da berdi. Avvalroq Indoneziya prezidenti Joko Vidodo ham Rossiya rahbari uchrashuvda onlayn formatda qatnashishi mumkinligini taxmin qilgandi.
Sammitda Ukraina prezidenti Vladimir Zelenskiy ham qatnashmoqchi. Uning matbuot kotibi Sergey Nikiforov aniqlik kiritishicha, davlat rahbari, katta ehtimol bilan, tadbirda onlayn-formatda ishtirok etadi.
G20 sammiti (eng rivojlangan va rivojlanayotgan iqtisodiyotga ega mamlakatlar, jumladan, Yevropa Ittifoqi davlatlari, AQSH, Rossiya, Xitoy, Buyuk Britaniya, Braziliya, Saudiya Arabistoni va boshqalarni birlashtiradi) 15—16-noyabr kunlari Balida bo‘lib o‘tadi. Indoneziya aprel oyida G20 yetakchilariga taklif yuborgan. Ukraina assotsiatsiyaga a’zo bo‘lmasa-da, tadbirga prezident Vladimir Zelenskiy ham taklif etilgan.
Mavzuga doir:
- Putin “sovuq nigohlar”dan qochish uchun G20 sammitiga bormaydi — Bloomberg
- G20 sammitiga Putin keladigan bo‘lsa, Zelenskiy unda ishtirok etmasligini ma’lum qildi
- Indoneziya Putin va Bayden o‘rtasida uchrashuv tashkillashtirishga tayyorligini bildirdi
- “Putin va Zelenskiy G20 sammitiga taklifni rad etmadi” — Indoneziya tashqi ishlar vaziri
Izoh (0)